Y’a trente ans aniet la nouvelle couleu d’Jèrri fut approuvée. Ch’fut lé dgix dé dézembre mil neuf chent huiptante qu’la nouvelle couleu d’Jèrri fut procliâmée par la Reine, not’ Duc.
Hoist the flags! The new Jersey flag (with the addition of the crest and crown) was proclaimed 30 years ago today.
George d’la Forge (29/12/1969)
À m’n idée, il est grand temps d’prendre les m’suthes nécessaithes pour adopter la vraie couleu qué j’dév’thions, comme bouans Jèrriais, êt’ ordgilleurs dé haûlîndgi au haut du mât à la pliaiche dé la crouaix d’St. Patrice, et tchi montre les léopards qué j’sommes ordgilleurs dé montrer sus nouos sou, nouos êtchussons et nouos tîmbres, et qué même la Grande Brétangne – dé tchi nouot’ Duc est la Reine – montre sus ses armeûthies!
J’avons-t-i’ assez d’vièrs Jèrriais dans l’s Êtats aujourd’aniet pour proposer l’adoption d’eune couleu tch’est Jèrriaise, Nouormande, et en même temps Britannique, pour en rempliaichi ieune tchi r’présente pûtôt l’Irlande qué Jèrri? Jé n’crai pon qu’Sa Majesté la Reine èrfus’sait d’approuver l’changement. Et i’ n’est pon bésoin d’aller bein liain pour un patron. La couleu en d’ssus du siège dé Moussieu l’Bailli dans la Chambre Législative est exactément l’patron voulu! Nou n’pouôrrait pon faithe mus qué d’la copier, et Mêssieus les Membres d’s Êtats n’ont qu’à garder l’yi sus sa bieauté pour l’s encouothagi à l’adopter. Et jé s’sais si ordgilleu d’la vaie adoptée dévant qu’nou piêsse mett’ ma poutchie d’vièrs os souos la bliête!
George d’la Forge (15/5/1976)
En pâlant d’couleurs, i’ m’veint à l’idée tchi’i’ y’a longtemps qué j’sis à êprouver à pèrsuader tchique Membre d’s Êtats dé proposer d’changi la couleu d’Jèrri à chein qu’ ou dév’thait être: Les trais léopards dé Nouormandie. La cheinne tch’est au haut du siège du Bailli dans la Chambre d’s Êtats est mangnifique. À m’n idée ch’est stupide dé continnuer à appeler la crouaix d’St. Patrice la couleu d’Jèrri quand ch’est en réalité la couleu Irlandaise. J’avons les trais léopards dé Nouormandie sus nouos sou, sus l’sceau d’nouot’ bailliage, sus hardi d’nouos timbres et sus nouos dotchûments officiels. Pouortchi pon sus nouot’ couleu?
George d’la Forge (2/6/1979)
Chein tchi m’gêne est que d’après l’rapport dans la gâzette, Moussieu l’Gouvèrneux et les présidents d’Conmités d’s Etats ont dèja approuvé la couleu montrée dans la gâzette. V’la tchi veurt dithe qu’ les membres d’s Etats, n’ayant pon veu d’aut’ portraits altèrnatifs, pouorraient l’accepter sus l’coup quand l’affaithe veindra sus l’tapis. A m’n idee ché s’sait danmage d’aller si vite auprès aver attendu si longtemps pour mett’ l’affaithe en allant. I’ m’sembl’ye tchi vaudrait mus examinner et considéther plusieurs dessîns.
Jé vai la couleu d’Jèrri sus san mât.
Y’a eune rouoge crouaix et y’a étout trais cats:
des léopards catis dans l’êtchusson.
Et v’là tch’est tout pliaichi sus un blianc fond.