Lé Caouain racontit ch’t’ histouaithe en 1938:

Quand Maît’e Cliément d’Caen vînt hier cherchi s’n Almonas, comme il en a tréjous l’habitude la s’maine de Noué, je li offrîmes les complîments d’la saison en li disant que je li souhaitaîmes une aussi bouanne Nouvelle Année comme la sienne qui vaint de s’êcouler avait ‘té. Car je savions bain que l’bouonhomme avait fait diversement bain sus ses patates et avait ieu une bouanne saison d’tomates ettou.

Et Maît’e Cliém nos raîponni. “Je vos r’mercie pour vos bouans souhaits et i’ faut espéther que la Nouvelle Année es’sa bain miyeuthe que chette-chîn, car autrement je sis un homme ruiné!”

“Oh, Maît’e Cliém,” je li dîmes, “ou n’allez pas nos convaincre que djais-neufs chents trente-huit n’a pas ‘té une année d’or pour vous, car souos touos rapports i’ n’y avait pas un autre fermi dans votre pâraisse qu’avait rêussi comme vous.”

“Nan, j’admets bain tout chenna,” qu’i’ s’fit, “mais ch’est la calamité de chute semaine qu’a trébutchi tout!”

“Bon? tch’est qui s’est don arrivé?”

“La maudite gelée, sapresti! Je n’m’attendais pas que je nos n’allions aussi subitement être êprouvés d’la sorte par un temps aussi infernal et je n’avais pas prins mes précautions. A cause de la plyie continuelle que j’avons ieu touos les autres jours, mes terres étaient comme un bourbyi, nou n’pouvait pas cachi d’sus, avec le rêsultat que je n’pus pas entrer mes raves en temps et j’en ai quatre vrégies qui sont entchiethement perdues. Il est vrai que j’ai tchiques bannelées d’navets mais tch’est qu’ch’est qu’chenna avec un fliotchèt d’bêtes-à-cornes comme j’ai. Et che n’est oquo pas là tout.

Une partie d’mes patates dans les soyiers sont fiches! Jamais je n’en ai oquo perd par la gelée, mais chute bordée ichin che n’est pas d’même. Je les visiti l’aut’e matin afin de m’asseuther qu’i’ n’y eusse pas de couothants d’air, mais à ma grande surprinse, quand j’vîns à les manier illes ‘taient comme des galots et je sis bain seux que quand i’ s’sont dêgelées j’en aithai perdu pus qu’les treis-quarts. Avec la s’menche au prix qu’oulle est je n’pouorrai pas les rempliaichi.

Criyous que j’m’en vais payi des treis ou quatre chelins la casse pour de la s’menche? Nennin par exemplye! J’aimethais mus laîssi ma terre à paître ès coucous!”

“Eh bain Mess de Caen,” je li dîmes, “je sommes bain affligis de penser qu’ous avez ieu touos ches malheurs-là et je vos offrons notre pus profonde sympathie.”

“Je vos r’mercie,” qu’i’ nos raîponni, “et j’apprecie vos sentiments, mais ch’n’est pas chenna qui rempliaiche ma marchandise.

Et pis j’n’ai pas fini. Ou n’avez pas oquo ouï tout.

Jeudi matin quand j’fus pour dêhaller man “lorry” pour faithe un tchéthiage, pas moyen de l’mettre en marche. Il ‘tait à sa pliaiche ordinaithe souos la tcherquethie et j’avais prins la précaution de couvri bain le d’vant avec des sacs et un tarpaûlin, mais malgré chenna la maudite gelée saisi l’ieau dé d’dans si bain que l’engin est bosté et un mécanicien qui s’y connaît m’a informé que che s’sa une affaithe de vingt louis pour le r’mettre en êtat.

Par en d’sus de touos ches malheurs-là, comme si che n’tait pas assez, ma “bath-room” qui m’avait couôté une petite fortune à installer i’ y a deux ans, est tout-à-fait en dêroute. L’ieau a gelé dans les tuyaux et i’ sont en partie crévés. I’ s’en va faller faithe venin les pliombiers et je tremblye d’penser au compte que j’aithai à lus payi quand la job es’sa finie. ch’est des gars qui n’travaillent pas à bouan marchi!

Quand ou v’nez tout-à-l’heuthe de m’souhaiter que la Nouvelle Année es’sa aussi prospéthe comme la derniéthe, ou n’saviez pas tout chennechîn sans doute, mais je vos asseuthe que je n’veurs pas subi une deuxième feis de patheilles avâries.”

J’avons ouï d’pis que Maît’e Cliém n’a pas ‘té l’seul victime du terriblye temps qui vaint de s’passer, et qu’i’ y en a ieu dans quâsi toutes les pâraisses qu’ont pus ou mains souffert, mais i’ faut espéther que l’nombre n’en est pas trop êlevé.

A chute saison chin ch’est à nous de tâchi d’oublier toutes nos êpreuves et nos chagrîns et nos lanchi dans la Nouvelle Année dans l’espéthance qu’ou nos rêserve la santé et touos les bonheurs que je nos entre souhaitons.

Mes chiers lecteurs et lectrices, le vier Caouain c’menche à châtchi au manche mais enfin il est oquo là pour vos offri ses pus sincèthes souhaits pour un Bouan Noué et une Heutheuse Nouvelle Année.

Caouain
Les Chroniques de Jersey 24/12/1938