Il est temps d’souhaiter Bouan Noué et Bouanne Année à touos les lecteurs dé chutte bouanne gâzette tchi nouos garde au couothant d’s êvènements tchi s’pâssent en Jèrri s’maine auprès s’maine. Hélas! Tch’est qu’nou f’thait sans quand nou-s-est à l’êtrangi?

Noué est l’occâsion d’èrnouveler accointance auve les anmîns au liain en env’yant des cartes d’Noué ès uns ès autres. J’veins d’en env’yer quâsi deux chents en Jèrri, en Angliétèrre, en France, en Belgique, En Australie, en Nouvelle Zélande, en Mexique et, sans doute, ès Êtats-Unis et au Cannada. V’là tchi veint d’pus en pus couôteux à m’suthe qué les prix des cartes haûchissent et qué l’Bureau des Postes augmente lé couôtage des tîmbres. Touos l’s ans jé m’dis: “Bah! Jé n’m’en vais pon en env’yer ch’t’ année, mais j’finnis tréjous par changi d’idée car ch’est, auprès tout, eune manniéthe dé faithe à saver ès anmîn sustout les cheins tchi d’meuthent au liain, qué nou né l’s oublyient pon ouaithe qué nou n’sé vait pon souvent. Et pis, i’ s’adonne tchiquefais, tristément, qu’eune carte èrveint auve deux-s’trais mots êcrits d’ssus dîsant qué la pèrsonne nommée sus l’adresse n’est pus. Dans patheil cas, si nou n’avait pon env’yé d’cartes nou n’éthait pon seu qu’un vieil anmîn n’èrvèrra pon Papa Noué.

Quand j’pense ès vièrs temps d’ma jannèche en Jèrri, j’donn’nais tchiquechose pour èrvivre la jouaie d’un Noué d’chu temps-là. I’ m’sembl’ye qué j’ouai acouo la clioche dé la Grande Églyise sonner d’pis méjeu la Sèrvelle jusqu’à mînniet l’jour dé Noué même. La preunmiéthe année qué j’m’èrsouveins d’aver ouï la sonn’nie, et qué jé d’mandis à Papa tch’est qu’en ‘tait la cause, i’ m’dit qué dépis 1461 à 1468 les Français avaient ‘té en otchupâtion d’l’Île, et qué, la libéthâtion arrivant dans l’s ambettes dé Noué, dé jouaie nou sonnit les clioches des églyises dé St. Ouën, d’St. Pièrre et d’Ste. Mathie, et qu’j’avions continnué d’célébrer la jouaie pour quâsi 500 ans.

Et j’m’èrsouveins du sens vénéthabl’ye et mouoyennement craintif dé respé tchi m’frappit la preunmié fais qu’Papa m’contit comme tchi qu’les vaques lus agenouoillaient à mînniet la Sèrvelle en adorâtion du Seigneur, qué l’ieau dans les boutchets dans l’êtabl’ye touannait en sang, qué ch’tait du sang tchi sortait d’la pompe et qué ch’tait mauvaise chance d’entrer dans l’êtabl’ye ès vaques à chu moment-là, même assez pour y tchaie mort! Man bouanhomme! J’n’éthais pon ‘té dans l’êtabl’ye pour autcheune chose la Sèrvelle dé Noué!

J’n’oublîthai janmais la jouais d’trouver des présents dans ma cauche pendue à l’ais du foyi ouaithe qué ché n’fûsse qu’eune orange et tchiques almandes et des nouaix et des codrettes. ch’tait sîngne qué Papa Noué n’m’avait pon oublié.

Pus tard, quand j’tais grand assez, l’grand pliaîsi d’Noué siez l’s uns et l’s aut’ où’est qu’nou jouait ès gages et qu’nou sortait d’houors auve la janne fille dé san chouaix pour conter l’s êtelles, qu’nou-s-embrachait les filles souos l’dgi tch’était pendu ichîn et là, sustout au haut d’s entrées d’portes, pour l’occâsion. Et pis ch’tait l’rêvillon. La mûsique pour danser – tchiquefais l’piano ou l’violon, mais souvent lé “concertina” ou l’ “flutina”, Nou dansait à toutes les notes dans chu temps-là, la Note à Huit, la Note à Trais et la Note dé Mèrgoton, lé Pas à Deux, la Ronde et l’Cotillon. La Valse ‘tait populaithe étout. Quand ch’tait en temps d’Noué, nou n’craîngnait pon d’ouï l’s anciens dithe, “Qué toute chutte valséthie-là n’amène pon l’pain à la bouoche!” et nou valsait à san tchèr content.

Quand j’tais grand, justément d’vant la preunmié grand’ dgèrre dé 1914-1918, les partis d’Noué ‘taient acouo en allant, mais j’avais pèrdu l’extase dé la trouvé d’présents dans ma cauche lé matîn d’Noué. Par chu temps-là j’avais dêpâssé la vîngtaine et rêalîsé que la belle légende dé Pap Noué ‘t’ait pour les êfants. À la pliaiche d’êprouver à m’garder rêvilyi la Sèrvelle pour êt’ seux dé l’vaie d’valer par la cheunm’née, j’allais à l’Églyise dé St. Simon en ville à La Messe dé Mînniet pour êt’ seux d’êt’ dans la Maîson du Bouan Dgieu pour les preunmié moments d’La Fête dé La Nativité dé Nouotre Seigneur. La Mémouaithe dé la veue d’l’Autel illeunminné par la lueu “scintillante” des chandeles dé Noué, et veu à travèrs d’un nuage d’enchens, et l’chant dé l'”Adeste Fidelis” mé fait envie d’pouver r’vivre chu temps-là qu’l’églyise ‘tait si plieine d’adouothateurs tch’i’ fallait un titchet pour êt’ seux d’aver eune pliaiche à s’assiéthe!

À ch’t’ heu qu’la vieilliche m’aîgue à joui des fêtes trantchillement et en fanmile, bein liain d’Jèrri, j’vouos souhaite, Moussieu l’Rédacteu, et à touos mes lecteurs et anmîns Bouan Noué, Bouanne Année, bouan pid, bouan yi, bouanne dent, et l’Paradis à la fîn d’vouos jours!

George d’La Forge 1972