As part of the 911-2011 celebrations, we’re introducing a poem into Jèrriais classes in schools this term. It’s a light-hearted look at aspects of Jersey history.

Pouor l’annivèrsaithe d’la Nouormandie ch’t’ année, j’sommes à pratitchi eune poésie dans l’s êcoles. Même pouor eune célébrâtion împortante, les mousses pouôrront niolinner un mio sus l’thème dé l’histouaithe…

Jé sommes des mousses dé l’Âge dé Pièrre;
jé chassons d’s êléphants laineurs.
J’nos abrions dans les rotchièrs.
Assa, jé n’sommes pon hainitcheurs.

J’sommes des pêtcheurs. J’têmes êffrités
d’vant l’arrivée du bouan Hélyi.
Tchi pitchi qu’sa tête fut copée,
mais Dgieu mèrcie – j’feûnmes êpaîngnis.

Achteu ch’est l’an neu chents trente-trais.
D’pis ch’t’ année j’sommes en Nouormandie.
Nos Ducs gouvèrn’nont à janmais,
mais j’avons nos vaques à vilyi.

Not’ Duc Dgillaume crouaîsit lé Ch’na.
J’têmes des soudards dans la batâle.
J’battînmes touos les Angliais! Hourras!
Achteu j’sommes en chèrge, ouôth’ en châle!

Quand l’Rouai Charles Deux fut procliâmé,
j’têmes mâtés là dans l’Vièr Marchi.
Et quand lé Rouai fut restauré,
i’ baillit l’Nouvieau Jèrri.

Dans la Milice, j’faîthons not’ d’vé
et j’avons siévi l’bouan Mâjeur.
Quand des Français vîntent nos gaffer,
auve Pierson, jé n’têmes pon pièrcheurs!

J’sommes des pilotes, et d’vant qu’adgève
mille neu chents douze, j’éthons du sport.
Nos avions d’val’lont sus la grève –
j’espéthons un aéroport!

En Jèrri, j’avons eune histouaithe
tch’est întérêssante, longue, et fiéthe!