J’avons eune pétite séthie don sus l’thème du r’censement.

With the 2011 census coming up, we’re running a short series of posts of texts on the theme.

Et une forme à remplyi

…”Nouffé,” ou dit, “car j’viyais par sa minne qu’ou voulait m’vais tout-d’suite. Ch’tait au sujet de chu census. Je n’sais pas comment qu’nou dit chu mot-là en jèrriais, mais tu te r’souveindras que j’eûmes la même chose y’a djais ans, et de l’embarras que j’eûmes à remplyi chutte fiche forme.”

“Vèthe, damme,” j’li dis. “Ou r’vint quatre fais et j’fus bein près d’être mins à l’amende de djais louis parsque j’n’avais pas mentionner que j’n’avais pas ‘té mathié pûs qu’une fais, et que je n’savais pas pour seux combein d’mousses que j’avais dans l’Portînfé. Enfîn, j’m’en deshallit à la fin. Est’che aussi pièthe chutte fais?”

“Pas aussi pièthe, mais bein pièthe,” ou dit. “Si ch’est vrai chein qu’la Bella m’a dit, y’a hardi pûs de tchestchions.”

“J’n’ai pas d’peine à craithe chonna,” j’li dis, “mais j’ai bein pûs d’peine à craithe que pour une fais la Bella a dit la véthité. Enfin, continue.”

La bouonefemme dit qu’ou n’pouvait pas se r’souv’nin de toutes les tchestchions. “Enfin,” ou continuit, “tu éthas à lûs dithe si tu couoche ocquo avec ta femme dans l’même liet, ou si j’otchupons des chambres s’pathés.”

J’lûs dithait que par bordée j’pâsse la niet souos la tcherquethée ou dans l’êtablye ès bêtes,” j’li dis, “et s’i’ veinnent vais si ch’est vrai, je laiss’sai l’tchian à-banon.”

“I’ faudra étout,” ou continuit, “que tu diche combein d’fais la s’maine que tu prends un bain, et change tan corset. I’ faudra, mé, que j’lûs diche combein d’galants que j’avais yeu d’vant me mathier, et si j’sis ocquo fidèle à m’n homme. Epis i’ faudra dithe tchesqu’est notre réligion, si j’sommes Protestants ou Catholiques, et si l’prêtre ou l’recteur veinnent nos vais de temps en temps.”

“Nou ditha,” j’li dis, “que y’a d’s années que j’n’avons pas veu l’recteur, mais que j’vivons en espéthance, et que j’espéthons tch’i’ veindra à notre entêrrement. Allons, n’en v’là assez pour à ch’teu, mais j’ai dans l’idée que j’éthai bein d’la chance si j’en êcappe avec une amende de djais louis chutte fais.”

Ph’lip
1961