À la santé dé Saint Patrice
À la santé dé Saint Patrice,
trîntchons nos pîntes dé biéthe!
La biéthe Irlandaise est un d’lice
car oulle est forte et néthe!
Lé ciel ‘tait nièr au temps pâssé
quand Patrice fut happé:
en escliavage pouor bein d’s années –
des néthes années, ma fé!
Mais la fouai d’Patrice ‘tait bein forte
et acouo rafraîchie
par toute sa ravaûd’die dé bort’
en aut’ par chu pays.
Auve la fouai, j’n’es’sons pon nièrchis
si ch’est qu’nou fait d’s êfforts,
pouor siéthe l’escliave, gardeux d’brébis,
sus lé c’mîn d’eune glouaithe d’or.
Mais aniet ch’n’est pon l’or d’la glouaithe
dé tchi tout l’monde jopîntent.
Nan, ch’est d’la biéthe tch’est forte et néthe…
et j’en béthons des pîntes!