Aniet ch’est la Saint Nicolas!
It’s the feast of Saint Nicholas today!

Au fîn tchoeu dé l’hivé,
tchi qu’il est tchi pâsse
et offre à châque avé
eune poutchie dé grâce?
Viy’-ous l’manté lithant,
robes dé rouoge et vèrt?
Dans sa pouque, des présents
pouor touos les p’tits avièrs.
Tchi qu’est ch’t engibâtré?
Li, tchi n’fait pon d’ma?
Rouoge et vèrt l’travèrs d’la né…
Hèque Saint Nicolas!

La sonn’nie du cliochi
pouor les prisonnièrs;
v’là Nico tchi geuthit
dans san rouoge et vèrt.
Lé pendard fut bliotchi.
Lé saint prêchit, “Paix
à touos ches pouôrres blioutchis!”
Les clioches sonnîtent en jouaie.
Tchi qu’est ch’t engibâtré?
Li, tchi n’fait pon d’ma?
Rouoge et vèrt l’travèrs d’la né…
Hèque Saint Nicolas!

Bouonne cache! Nic’lesse viagit
au liain en baté;
la tempête à m’nichi,
Nico à prier.
Tout l’tou la mé rud’dgit,
les louêmes fortes et folles.
Nic’lesse mînt tout au lis
atout ses saintes patholes.
Tchi qu’est ch’t engibâtré?
Li, tchi n’fait pon d’ma?
Rouoge et vèrt l’travèrs d’la né…
Hèque Saint Nicolas!

Dans eune aubèrge couochi,
Nic’lesse dêmuchit
les victînmes d’un bouochi –
toute eune bathilyie.
Né v’là l’s èrssuscités,
châque pétchiot entchi.
Èrmèrcions l’chein tch’a r’grée
d’s êfants d’sêtchilbouêtchis.
Tchi qu’est ch’t engibâtré?
Li, tchi n’fait pon d’ma?
Rouoge et vèrt l’travèrs d’la né…
Hèque Saint Nicolas!

Trais hardelles en pouôrreté,
par lé d’so d’lus péthe;
à êt’ mînses sus l’pavé,
pèrdues en mînséthe.
Nico prînt sa poutchie;
lus vèrsit des louis.
Il avait tout changi.
Chang’-ous acanté li!
Tchi qu’est ch’t engibâtré?
Li, tchi n’fait pon d’ma?
Rouoge et vèrt l’travèrs d’la né…
Hèque Saint Nicolas!