Ches peûles dé grôsses têtes Espangnoles r’ont ‘té à m’nichi nos couôsîns d’Dgibrâltar ch’t Êté. Né v’chîn un but par George d’La Forge dé 1964:

George F. Le Feuvre passed through Gibraltar on his travels. This extract reads a bit like a proto-travelblog:

Gibraltar

Lé 18 dé mar nouos trouvit dans la cauchie à Gibraltar. Là, j’passis man temps à vaie d’s anmîns qu’j’avais rencontré à Florence, en Italie, en 1950, où-est tch’il’ ‘taient à passer lus leune dé myi. Il’ ont trais êfants à ch’t heu, et lus deux garçons sont à l’êcole en Angliétèrre. Et pis j’passis tchique temps dans la belle Cathédrale Anglyicane dé La Sainte Trinité. Là, j’rencontris un Minnistre Dgèrnésiais, lé Révérend Giles, tchi fut êl’vé dans la congrégation d’l’Églyise dé St. Stephen’s dévant aller au College dé Kelham en Angliétèrre, où-est qué l’Révérend Hibbs, aut’fais Recteu d’La Trinn’té en Jèrri, apprîns sa théologie.

Comme j’avais dêjà visité Gibraltar, jé n’tais pon întérêssi à vaie les tonnelles et fortifications (autant comme i’ vouos en montrent!), mais j’allis r’vaie l’ancien p’tit chînm’tchiéthe justément en d’houors dé la ville, où-est qu’un tas des mat’lots et soudards tués à la batâlle dé Trafalgar en 1805 sont entèrrés. J’èrgardis sus les tombieaux pour vaie si j’y trouv’thais des noms Jèrriais. J’en trouvis deux tchi pouorraient êt’ Jèrriais ou Dgèrnésiais – lé Lieut’nant-Commandeur George Le Blianc, de la brig H.M.S Fearless (sépultuthe No. 137), et l’Cap’taine J.B. Manoury, du 35me. Régiment (Sépultuthe No. 113). Dans chu cas-chîn, les chiffres 1771-1809 auprès san nom pouorraient montrer qué l’cap’taine Manoury né fut pon tué à Trafalgar, et tch’i’ mouothit à l’âge dé 38 ans. I’ n’y avait rein tchi montrait l’âge au Sieur Le Blianc.

Gibraltar – lé rotchi a deux mille et d’mi d’long et 1,400 pids d’haut – est si bein connu qué jé n’m’en vais pon entanmer s’n histouaithe, mais en convèrsation auve lé Sieur Garcia, l’anmîn qu’j’allis vaie, un homme tch’a eune grand’ boutique dans la ville, i’ m’dit qu’les conmèrçants et les gens d’bein, et touos l’s ouvriyèrs dé bouanne èrnommée à Gibraltar, forterêsse Angliaîche dépis 1704, ont crainte qué l’s Angliais, si génétheux et prêts à r’donner tout ch’tch’il’ ont gangni atout tant d’peine, pouorraient êt’ bêtes assez dé r’donner Gibraltar à l’Espangne, tch’est à prandre avantage d’s êvènements d’nouos jours pour démander pour, viyant qu’ch’est partie d’san pays. Si ch’la s’arrivait, disent-i’, la pauvrété et l’gouvèrnément d’chu pays-là apportéthaient la mînséthe à la population dé 21,000 habitants, et la banqueroute ès conmèrçants! Faut espéther qué lus crainte né s’sa janmais justifiée!

George d’La Forge
20/11/1964