Dînmanche, nou n’a pon à sé l’ver à sinne dé jeu;
nou tchait sus sa fache – nou dort sus san dos.
Dgieu spartit la leunmiéthe d’auve la nièrcheu.
Nou n’est pon nièrchi d’faithe un jour d’èrpos.

Lundi, Dgieu spartit la tèrre d’auve les cieux.
J’faîthons not’ lavage coumme l’affaithe s’arreune
(mais ch’est les machinnes tchi nos aîguent achteu).
Dgieu griyit l’ciel – et ch’est lé jour d’la leune.

Mardi, Dgieu s’pathit la mé d’auve la tèrre,
et s’lon not’ diton: “Tchi tèrre a, dgèrre a”.
Chu jour-chîn ch’est l’jour au vièr dgieu d’la dgèrre,
mais ch’est d’espéther la paix… nou vèrra!

Mêcrédi, not’ Seigneu satchit l’solé.
Mais pouor l’s anciens ch’tait l’jour au dgieu Mèrtchuthe,
dgieu des voleurs. Si ch’est qu’nou veurt voler
l’solé, nou-s’attrap’thait des boursoufliuthes!

Jeudi, Dgieu griyit l’s ouaîthieaux et paîssons:
l’s ouaîthieaux qu’nou plieunme, les paîssons qu’nou-s’êcrède.
À l’Olŷmpe, Jupitèr d’valit san mont,
s’touônnant en aigl’ye pouor gaffer Ganymède.

Vendrédi, Dgieu fît les bêtes et les gens.
I’ dit au preunmié coupl’ye: “Séyiz fèrtiles!”
Véthe, ch’est un bouôn jour pouor l’accoupliément:
Vênus règne sus l’s amours d’garçons et fil’yes.

Sanm’di – tout ‘tait bouôn. L’Seigneu pièrcheûthit.
Si ch’est l’jour qué l’Bouôn Dgieu r’nonchit l’travas,
j’îthons don au marchi, tard ou heûthi:
ch’est l’jour d’Saturne – ou l’jour qu’nou r’touônne san sa.