Où n’aveais ni besoin du docteu, ni du yiet,
Si où vouleais faithe justement comme j’ ai fait,
Alleais dans David Place, siez de Faye l’Pharmacien,
Pour Johnson’s Cough Mixture qu’a l’y seul appartient.

Y’en avait iun du Carrefour Sélous
Tchi s’dguérit eune fais d’eune hôrribl’ye toux,
Car i’ s’fit du syrop
Auve d’la graisse dé pirot
Et s’vantait, ma fé, qu’il avait bouan goût

Tranchiz des cârottes et couvriz-les auve du jaune chucre. Laîssiz pouor un coupl’ye dé jours. Prannez eune tchul’lée du jus trais fais par jour pouor dgéthi la toux

“Eh, bein,” Manman lî dît, “ch’est bein aîsi. I’ n’est pon bésoin d’êt’ docteu pour en faithe. J’mé d’mande même si les docteurs y craient, à chu sitho, mais il est fanmeux pour èrdgéthi du fraid. Dis à la bouannefemme dé dênichi deuxs’ trais colînmachons l’sé, d’eune muthâle tch’est propre, et i’ faut tch’i’ s’saient enfreunmés dans lus cruques. Lé sitho dait êt’ fait frais châque jour. I’ faut prendre trais colînmachons, l’s êssuyer bein et les mett’ dans eune souôtàsse. Et pis i’ faut taper sus l’hait d’la cruque pour la cratchi, et les saûpoudrer atout du jaune chucre et les laîssi d’même toute la niet. Lé lendemain au matîn, i’ faut ôter cruques et colînmachons et ajouôter du jus d’limon ou d’orange, ou d’l’essence d’almande. Né v’là tchi fait eune tchul’lée à thée d’sitho, assez pour eune fais pour un p’tchiot. Pour eune grand’ pèrsonne il en faut pus.”

Et pis si les mousses ont la toux
I’l n’y’a rein miyieu; èt ch’est si doux,
Un miyio d’gris pap’yié, êt en d’sous
D’la graisse d’chandelle.

“Mon Frainque, j’ai lé r’miède pour té! J’m’en vais t’êcrithe eune prescription pour eune grand’ boutillie d’sirop d’figues. Prends- en eune verrée à vin plienne trais fais par jour et j’té garantie qué tu t’en vas être dgéthi!”

“Ch’est eune TOUX qué j’ai, docteu, comment qu’du sirop d’figues s’en va clièrgi ma toux?”

“Man garçon” rêponnit lé bouanhomme “quand t’éthas print trais verrées d’ sirop d’figues, tu n’OS’RAS PAS d’toutre!!!