Du Jèrriais entouor les musées:
Some museum-related Jèrriais:
En ville, n’ou m’a dit, qué plusieurs Messieux
Ont fait un “Musée” ouèqu’ tout chein qu’est vieux
Est bein merqui et cliâssè –
Jé n’sait si y’iont mint parmi paissons stoffès
Et squellettes dé bêtes dé maûvaise ernoûmmèe
Yieun dé m’s’anchêtres: lé parapluie du Temps Passè???
Dans l’portrait dans la gâzette tchi montre la cérémonie au Châté Élizabé, j’ai r’connu Moussieu l’Bailli Vèrnon et l’Dénonciateu Joshua Alexandre Balleine, mais j’n’y vai pon l’Vicomte Edmund Toulmin Nicolle. I’ m’sembl’ye aver veu san portrait dans l’Musée d’La Sociêté Jersiaise en Ville, atout un bieau rouoge couossi avec des cliés d’ssus. I’ m’veint à l’idée qu’ch’est p’t êt’ les cliés du Châté tchi lî fûdrent probaliément données en garde par Moussieu Vèrnon à ch’t’ occâsion-là.
Et j’èrvai acouo Missis Alexandre, née Vibèrt, la femme dé journée, à pêtri la pâte dans l’tro. Chu tro à pêtri tchi fut, ch’est quâsi seux, lé drein en usage dans l’Île, et tch’est à ch’t heu au Musée d’La Sociêté Jèrriaise.
Pourtchi n’en faithe pas eun p’tit, mais biaux Musée,
De toute les tchuriozitais que nou pouorais vais
Et eunne tcheuisine Jerriesse tchique ou yen dite,
Mé je crai que s’rait tchique chose de magnifique
Avec tout chaque qui yiavait le temps passait,
Depis le trépi, le bachin, la chaudiethe et le craset,
Et la coniethe pour mettre le boïe de dans,
Et les banchets pour s’asiethe au sé à se chaufé,
Et la chandelle et l’changli pour pouvé allumé.
Le vier caouain, le sien qui vint dans chu monde de minzèthe pour baillyi d’sa bec à tort et à travers, qui pitchait l’amour-propre de tchiqu’uns et qui souol’vait la colèthe des court de pé, chu vier caouain s’en va et bein seux s’i peut picoter tchique saoucisses allemandes, i’ f’tha un fricot comme i’ n’en a jamais d’sa vie ieu. Si seulement il avait la forche de prendre le grand sabre au kaiser et de l’obligi à l’envier au musée de la Société Jersiaise, j’vos asseuthe que v’là qui s’sait fait dans un clin dyi.
Je n’mé ravis pour qu’là vieille Chronique eusse restè siez l’yi. Ch’tait pon là une plièche pour des anciennes coumme chonna. Tout l’monde pâlait, couothait, r’gardait, allait, r’venait, s’trempait, s’sètchait, se r’trempait derché. Tchi journée! N’y’avait qu’l’hôlouoge qui restait tranchille. Ou n’bouogi pas pus qu’on n’a fait fait déd’pis douze ans. I’ f’thaient aussi bein d’la d’valler. Si l’animâtion d’Mardi n’put pon la rêvillyi et la rapp’ler à san d’vé, oul est bein fichue et l’seul établ’yissement qui lis conveint est l’Musée dans Pier Road. Moussieu l’Avocat Nicolle: prenez en note!
Lé grand r’pas du sé s’faîthait sus eune rouelle dé boeu (nou d’bitait la rouelle atout lé “grand couté a viande”, d’eune londgeu d’vîngt-chinq pouces, l’aleunmelle étant d’dgiex-huit pouces atout un manche dé sept pouces. J’pense qué l’seul tchi reste dans l’Île au jour d’aniet, un couté d’eune chentaine d’années, est l’chein qué j’présentis et qu’j’avons au Musée d’Agritchultuthe à La Hougue Bie)
Ouaithe tch’i’ y’a longtemps qué l’Juge Roy Bean n’est pus, sa r’nommée et s’n amour pour Lillie Langtry sont restés dans la mémouaithe des gens du Texas, et sa bijuque est acouo d’but à Langtry dans l’ouêst d’l’Êtat. Oulle est gardée en bouan ordre, et est un objet d’întéthêt pour les vîsiteurs et touristes tchi pâssent par-là, et l’annonce “The Jersey Lily” est acouo sus l’haut d’la porte. Ou’ pouvez en vaie un portrait, bouannes gens, dans L’Musée d’La Société Jersiaise en ville. Ou’ l’trouvethez pendu sus la muthâle dans l’coin tch’est rêsèrvé pour montrer l’s êffets tch’apparténait à la fanmeuse et belle “Jersey Lily”!