Acouo un but d’eune articl’ye du 21/9/1912 du Caouain:
Another part of an article by GW de Carteret:

Avous ‘tai vaie ches grosses pierres là que Messieurs Nicolle et Sinel ont dêcouvert à Grantez, à St. Ouain?

Ou n’dévéthiez pas mantchi à vaie tout chenna, car chest bain intéressant, surtout pour touos les siens qu’ont du goût pour les choses préhistoriques. En maniant yune de chest têtes de haches que nous y trouve, ous êtes peut-être à contemplier l’ôti avec tchi yun de vos arrière grandpéthes fendit la tête à sa bouannefemme quand ou r’fusi de couôtre des boutons sus sa pé de biche.

Touos les messieurs de la Société Jersiaise sont sans doute bain contents d’aver trouvé dans difféthentes parties de l’île, les os et les dents de toutes sortes d’animaux que existaient y-a des chents mille ans, mais j’ai ouï de bouanne part que chein qui les chagrine pus qu’autchune chose, chest que, malgré les récherches les pus minutieuses, y n’ont pas oquo peut trouver une stchélette de caouain.

Inutile de cherchi, messieurs, les caouains de chés temps là n’étaient pas une mie mus r’gardés qui n’le sont acheteu, et quand y-en avait yun de tithé avec un arbalêque, ou bain qu’nous en trouvait les fours en haut dans les mielles, nou ne lus faisait pas l’houneurs de les enterrer dans des “allées couvertes” avec les animaux respectables, mais nou faisait comme y-en a biaucoup qui voudraient faithe acheteu, nou les brûlait au feu jusqu’à chein qui n’en restisses que les chendres.

Il y a des moments que je veins à aver les exprits bas et dans ches bordées là, je sis tréjous à ruminer que che s’ra là probabliément ma fin mé. Je pense tréjous que je s’rai trouvé mort sus man travas.

Tchique biau matin, quand Bill Hueulin vaindra à l’office, y m’trouvetha àccouté sus l’desk, avec une plieume à la patte en train de vos êcrithe, et n’ayant pas de raiponse à san “Bon jour”, y f’tha l’touo du counteur pour dêcouvri que l’pouore caouain a tait sa bec une fais pour toutes.

Bill Hueulin, là-d’sus, dèshallera san mouochet – pas pour plieuthé, bein entendu – mais pour bouchi san nez, et de l’aoutre main y m’prendra par un pid et me portétha à londjeur d’bras pour ensuite me fiantchi sus l’haut d’la “dust box.” Comme je cré bein que les cattes à Mess Bisson lus respectent trop pour faithe un fricot sus ma pouore carcasse, il est tout probable que je s’rai capsizé dans l’hernais parmi des fielles de caboches et des héthèques de paîsson et portèt jusqu’au haut du Parc pour être enfin crématisé dans le “destructor” d’la pâraisse.

Ch’en s’ra-t’y là unne belle fin à unne noble cârrièthe comme la mainne!!

Ah ça! si tout chenna s’arrive, ou pouvez bain vos fidjuther la perte de temps et le désappointement des membres de la Société Jersiaise dans djais mille ans d’ichin quand y s’ront à touanné Jêrri chein d’sus d’sous pour trouvé men illustre stchélette.