L’Assembliée d’Jèrriais en 1971:

A bein près 120 membres lus rêunîtent vendrédi, l’30 d’avri, dans la Salle Pârouaissiale dé Ste. Mathie pour vaie les films prîns duthant et auprès l’Otchupâtion par Moussieu George Bertram.

D’vant c’menchi, l’Président èrmèrcyit l’Connêtablye R.H. Le Cornu pour la salle, et l’Connêtablye, en rêponnant, dit qué ch’tait un pliaîsi dé vaie tant d’monde dans la p’tite Salle dé Ste. Mathie.

Lé rapport du jeu d’cartes fut liu et accepté; la correspondance fut liue et chînq nouvieaux membres fûtent êlus.

Auprès l’s affaithes, lé Président mint l’restant d’la séthée dans les mains du sieur R. Bertram auvec lé film qué san péthe avait prîns. Lé Sieur Bertram adréchi L’Assembliée en Angliais et donnit un discours qui duthit eune heuthe et d’mie pâssant, et n’en v’chîn un court résumé.

Quand Jèrri fut otchupé en 1940 toutes les maîsons fûtent obliégies de pendre eune blianche couleu et y’avait eune blianche crouaix dans l’Vièr Marchi. Sus toutes les grèves nou viyait des trappes pour les “chars d’assaut”, et bein des cannons pliaichis à plusieurs pointes coumme Sorel, Bouanne Niet, Les Landes, Nièr Mont, et La Corbiéthe.

Y’avait un Rév. Corrin qui donnait les nouvelles duthant san sèrvice au dînmanche. i’ gardait san radio souos les soûffliets dé l’orgue dans l’Êglyise et l’Sieur Bertram ‘tait soûfflieux d’orgue.

Auprès tchique temps i’ fallait înmprînmer les tîmbres ichîn en Jèrri.

Les Allemands faîsaient sèrvi La Rocco pour un mèr à tither auvec lus cannons, et des maîsons coumme en Êgypte à La Trin’té les gens avaient deux jours à êvacuer.

Lé prix du beurre ‘tait £1 5s. 6d. la livre, lé grain £8, et la litcheu £10. Y’avait qu’un chent d’bouais alloué par mais pour caûffer et trente tonnieaux dé faus pour faithe des chabots.

Lé monde allaient tchuithe lus dîner siez les boulandgièrs, et les Allemands avaient les Jèrriais empliyés à faithe la Route du Nord. Lé 3 d’octobre, 1944, y’avait 14 mille Allemands sus l’Île. I’ fallait qué châque pâraisse fournîsse 100 oeufs toutes les deux s’maines: mais auprès Noué, 1944, lé “Vega” arrivit auve lé mangi, et l’9 dé mai les soudards Angliais attèrîtent. Au mais d’juîn les Jèrriais eûtent lé pliaîsi d’aver eune vîsite par lus Majestés, lé Rouai George VI et la Reine Lîsabé.

Quand les films fûtent finnis lé Sieur Bertram r’chut d’grands appliaudiss’ments bein méthités.

Lé Sénateu P.J. Romeril l’èrmèrcyit et dit qué ch’la avait rapporté bein des mémouaithes et qu’i’ fallait aver ieu hardi d’couothage pour prendre des portraits comme chonna.

Les membres du conmité Dramatique sèrvîtent eune tâssée d’thée à tous.

Lé Président èrmèrcyit tous pour être v’nus et l’Conmité Dramatique pour lé souper.