En 1973 George d’La Forge explyitchit l’scandale dé Watergate ès lecteurs d’la Gâzette du Sé (i’ ‘tait un grand supporteux du Président Nixon, li) et l’compathit ès êlections en Jèrri du temps pâssé:

In 1973, George F. Le Feuvre (a great supporter of Richard Nixon) provided this explanation of the Watergate scandal by way of comparison with Jersey elections times past (the two competing parties then were the Laurel and the Rose):

…Tout est boulevèrsé dans l’monde ches jours. À Washington, les Démocrates font d’lus mus pour troublier l’Président Nixon (Consèrvateur du parti Républicain) viyant qu’des membres dé san parti êprouvîdrent à mett’ des êcouteurs dans lus appartènements d’assembliées d’êlection. J’mé r’souveins qué quand j’tais mousse les Louothièrs à St. Ouën avaient lus “écouteux” – ch’tait un homme dans chu temps-là – muchi dans les vèrt-bouais à côté d’l’entrée d’la maîson du candidat Rôsyi pour ouï combein d’vieaux qu’san parti avait payi pour voter pour li. Ch’est seux qu’les Rôsièrs faîsaient la mème chose étout siez les Louothièrs, mais ch’tait au pus fort la pouque lé jour dé l’êlection et tout l’espionnage ‘tait oublyiyé ou accepté d’bouanne part des deux côtés. À la pliaiche d’en faithe autant, nouot’ Congrès à Washington, tch’a eune bouanne mâjorité d’Démocrates comme membres, n’a fait rein ch’t année qué d’nommer des conmités d’entchête pour êprouver à punni les farceurs et discréditer l’Président tchi n’a pon l’temps d’s’otchuper d’ité viyant tch’il a du travas d’împortance mondiale par sus l’s ièrs à la Blianche Maîson…