Le caractéthe de Cliément d’Caen, fermi, propriétaithe et principa d’paraisse, est pus ou mains connu des gens qui liésent chutte gazette ichin.

Pus d’une fais dêjà, nous a peu s’rendre compte par les conversâtions entre li et Laïesse Ernon et mai, que le vieux est passabliément finaill’yi. Nou pouorrait même dithe qu’i’ cop’thait un liard en quatre, bein qu’i’ s’sait pouorri d’sous, et n’laissait pas un pouorre dêgnill’yi humer l’odeur de sa soupe sans tâchi de l’faithe payi pour, dans un sens ou dans l’autre.

Ch’est en tchi, ou’ ne s’sez pas surpris d’apprendre qu’en entendant dithe à Laïesse Ernon, y’à un p’tit brin, que Cliément d’Caen a dépensè la m’illeu’ partie d’une bille de chinq louis pour san fricot d’Noué, j’en ai restè tout drôle. Mais, coumme ou’ pouver l’penser, v’la qui d’mande d’être expl’yitchi. Ne f’chin l’expl’yicâtion…

Cliément d’Caen est au pliâtre! La s’maine passèe, oprès s’être êcauffè à clièrgi ses cressonniéthes, i’ s’apitchi l’long d’un fossè pour une heuthe de temps dans l’espéthance de vaie tch’est qu’allait dans san côti, au ser, mettre des pièges à lapins. I’ n’attrapi pas s’n’houmme, mais il attrapi une casaque de fraid, qui l’a empêchi d’sorti dépis et l’y’a fait compliètement perdre la vouaix pour le temps.

Joseph Le Boutill’yi, san p’tit domestique, tout bête qu’il est, a profitè d’la chance pour se r’vengi un mio de toutes les minsèthes que l’vièr Cliément l’fait enduther à londgheu’ d’annèes. Faut dithe que ch’est Laïesse Ernon qui y’a montrè le plian au c’menchement. Ach’teu, l’affaithe va toute seule… et le bouan houmme affol’la si v’la qui continue trop longtemps, – Tu’es maître d’la situation, Joe, lis dit Laïesse, le vieux n’peut pon s’faithe ouï, san roumatisse dans l’co l’empêche de faithe des signes de tête et coumme tu n’sai’ pon liéthe, i’ n’gagne rein d’êcrithe pour te dithe chein qui veurt.

– Bon, Mess Ernon! Et pis?

– Eh bein, bûzard, arrange-tai pour vivre gras pour le temps, passe un bouan Noué, c’mande chein qu’tu veurt, faudra bein que l’bouan houmme paie!

– Oui, mais coumment faithe, Mess Ernon?

– Tout ch’que tu veurs, Joe, d’mande à tan maître si ch’n’est pon là chein qui voudrait ch’t’annèe pour lis baill’yi du tchoeu et le r’mettre sus pid! I n’pouorra pas t’rêpondre; – dêtouanne ta tête pour ne vaie pon ses mouvements et pis prétend qu’il a tréjous rêpounnu justement chein qu’tu voulais aver. Fait la mine que tu n’est pas trop seux mais que l’bri qui sortitha d’sa gorge te r’sembl’ye tréjous à un oui…

Le Joseph est bête mais il est gourmand, et dame! le plian lis conveint à merveille.

Il a m’nè l’affaithe rond’ment et avec le plus grand succès.

I’ d’mandi au v’i’ voulait avair un pico à Noué, pour un change (ils avaient yeu du jambon huit ans de siète!) s’i’ criyait que y’un de seize livres suffithait; s’i’ fallait faithe faithe du podin, d’la gâche, acater une demié douzaines de rouoge vin, une boète de cigares, des nouaix, etc, etc., si un mio de rêvillon ne lus f’thait pon de bein; s’i d’mand’dait à ses frèthes et soeurs et à deux-trais amins de v’nin dîner avec yeux, enfin, jamais la maison à Cliément n’avait veu rein d’itè.

Laïesse Ernon, oprès aveir souffliè tout chonna à Joseph, qui répétait la leçon coumme un perrot, allait vaie le vieux dans sa chambre, approuvait des suggestions du domestique, félicitait le malade de san bouan tcheu, et lis disait que n’y’avait rein coumme la bouanne chère à Noué…

Cliément rouolait l’sièrs, s’étouffait quâsi pour lus crier qu’i’ faisaient justement l’contraithe de chein qu’il êprouvait à lus dithe… et finissait par être prins d’une bordèe d’toux qui lis dêrâcliait la gorge.

Et ne v’la coumment que Cliément d’Caen, bein malgré li, offrit un bouan noué à un tas de monde qu’il éthait voulu vaie siez l’Pape – tandis qu’il ‘tait, li, à supper du gruai et à baithe du sitho’ d’ouognon.

Elie
1917