Lé Drédillet d’Noué

Les êtailes êcliaithent la séthée,
châtchun d’nos pas, châque engambée;
j’montons amont lé drédillet
tchi nos mèn’na au nouvieau-né.

Jé chabolons sans r’mèrtchi dgéthe
les rocques avaû la caramiéthe;
lé ponsi cliute à nos habits,
les trébules font drotchi nos pids.

I’ vente – la fraid n’est dgéthe sténabl’ye…
mais v’là, j’arrivons à l’êtabl’ye;
lé p’tchiot est paisibl’ye là dans l’bèr.
Paix étout ès cieux, sus la tèrre!

Lé drédillet s’sa r’grée tout drait;
nos vièrs habits changis en souaie;
les rocques et trébules apliaties;
eune êtaile grée d’châque brîn d’ponsi!