Né v’chîn l’texte d’aniet d’not’ auteu du mais, Elie:

Here’s today’s text by our author of the month, Elie:

Préface.

Jé n’sis qu’une vaque, il est bein vrai,
Mais, sâpresti! je sis bein minséthabl’ye;
Et ‘n’faut pas, dame! en être surprins:
La vie ach’teu’ deveint insupportabl’y’e,
A un tè point que dans des temps
Je voudrais bein n’aver jamais veu l’monde.
J’en brai’ parfais coumme un êfant.
Que nou m’en ouait pus d’un mille à la ronde –
Voul’ous m’êcouter pour un p’tit,
Tandis que j’vos f’thai ma triste compliainte?
J’sis seûthe qu’ou’z’ethèz pitchi d’mai
Quand ou verrèz à tchi que j’sis contrainte.

Ma Naissance.

Je vins au monde un Mêcrédi
N’y’a pon rein d’drôle à chein qué j’m’en rappelle:
Toute la séthèe, en m’attendant,
Jean L’Brun, man maître, assis sus la scabelle,
Et Louis, l’valèt, sus un soubat,
Châtchun à san tou’ liêsaient la gazette
Qu’Maitr’ Jean Du Heaume avait, l’matin,
Apportè d’vaut qu’les vaques fussent occouo traites –
La vielle lanterne, au cro’ pendue,
N’lus dounnait pon une grand’ sorte d’lumiéthe;
Mais quand même, i’ s’griyaient occouo
A dêchiffrer touos les nièrs caractéthes.
Y’un d’ieux liêsait et l’autre, d’un yi,
Dghéttait ma méthe, couochie au bas d’sa stalle,
Tandis que l’vièr brun maringo
S’rouolait, s’grattait et dormait dans la paille.
La poule, à couer dans un bathi,
Clionq’tait parfais, coumme s’ou n’tait pas contente
De vaie la nièt touannèe en jour
Pour tchique raison qui n’tait pon appathente.
La brune géniche – une soeur à mé –
De temps en temps saq’tait sus sa têtchiéthe
Et se r’mettait à ruminer
Ou à mauler s’n’êtrain ou sa feûgiéthe.
il appréchait dêja d’min-nièt,
Les hoummes hôtaient, à la veue d’la chandelle,
Tchan, g’niche et poule avaient l’s’ièrs clios,
Et par la f’nêtre, nou viyait l’cliai d’êtelles
Quand j’arrivi au monde, enfin……
“Viy’ons tch’est qu’ch’est, chutte fais, qu’ou nos rapporte,’
Se fit man maître en me r’gardant..
– “Passe don l’gros sè, – il est aupi d’la porte –
Si ch’est un boeu j’ne l’garde pon,
Mais dans l’autr’ cas, si ch’est une belle géniche,
Je l’êlev’thai, la demande ach’teu
Est tréjous bouanne et – sans vouler être riche –
Nou-z’aime aver de tchi montrer
Quand les marchands veinnent vos payi visite…”
“Oh! Ha! Moussieu, se fit l valet,
Ch’est une géniche, viy’ous la belle petite!….’

Triste qu’menchement.

Je fu’ pitchie en un instant
Les fièrs en l’air sans égards pour ma mèthe
Qui pour me vaie et m’embrachi
A tigue de corps hallait sus sa têtchiéthe,
Tithait la langue, long coumme le bras.
Souffliait, beûlait, en ouvrant sa grand’ goule,
Tâcher d’m’agner aver ses pi’ds,
Et faisait tant de tiné qu’la pouorr’ poule,
Dans san bathi, s’effrédolait…
Maître et valèt me frottaient a raidde brache
Ov du gros sè, sus touos les bords,
Sus les dghéthets, le dos, l’ventre et la fache,
Jusqu’à ce que j’fusse à bu d’man vent!
Ma méthe beûlait tristement, chutte pouorre vielle,
En aloignant l’musé d’man bord
Tandis que j’tais à tremblier coumme une fielle
Entre les mains d’maitre et d’valèt…
Ch’est du’, viy’ous, en arrivant au monde,
D’étre ergardèe avec soupçon;
Et d’se d’mander si dans deux-trais secondes,
Nou n’ouïtha pon l’verdict cruel:
“Che n’est ichin qu’une faillie p’tite bricole,
L’bouochi l’étha dès l’préchain mais
Nou n’s’abuse pas à garder des quédolles
Qui dêhont’taient ch’t’êtabl’ye ichin…!”
Maître et valèt, sans s’gêner d’ma minzéthe,
M’examinaient d’la tête ès pids,
Assèz pour que j’en fusse pus tard de piéthe.
J’en ‘tais tout à fait au m’sespé.
I’voulaient vaie s’i’ y’avait espéthance
Que j’eusse un jour un bieau piécho:-
Si ch’est qu’j’avais justement la distance
Qui’ faut aver entre les trans;-
S’ils ‘taient, les quatre, d’la londgheu’ nécessaithe –
Pas êlindghis, et pas trop courts;
Et si je t’nais, pour chounna, d’ma grand’méthe
Qu’avait, j’comprends, unn’ tè piécho
Qu’nou le r’gardait tréjous coumme un modèle.
l’ continuaient, don, à m’gorner
S’entre êcliaithant ov la veue d’la chandelle
I’ s’asseuthaient qu’man co ‘tait fin,
Man musé né, le d’dans de m’s’ouothelles jaunes;
Ils éthaient même voulu saver
Dans combein d’temps qu’nou pouorrait vaie mes cônes!
Ma langue et l’bu d’ma coue ‘taient nièrs,
J’avais les gambes fines et pas trop mal faites,
Ils aimaient bein assez mes yièrs,
Et i’ trouvaient ma croupe quâsi parfaite.

Compathaison.

Lus examen finit enfin
I’ n’duthi que deux minutes à vrai dithe, –
Assez longtemps pour que l’fermi
R’mèrtchisse les points qu’i’ faut si bein dêcrithe
Pour les messieux qui font l’Herd Book.
Ah! chu Herd Book, ch’est la minzéthe èt g’niches
Es boeux ès vaques et ès p’tits viaux!
Les bêtes à saie, les brebis et les biches
Sont-i’ heutheux d’en êcapper!
Pour yeux occouo la vie est agriabl’ye.
I’ naissent et vivent et meuthent en r’pos:
Mais nous! J’avons d’s’embarras incriyabl’yes
Tout ch’que j’faisons va dans l’Herd Book!
Ah! que l’monde est cruel au vieau!
J’veins d’vos montrer coumment qu’dès sa naissance
De tout ch’qui peut l’faithe ermèrtchi
Nou s’mèt bein vite à prendre counnaissance.
N’y a pas d’pitchi pour autchun d’nous:
Un houmme est maître absolu d’sa persounne;
I’ peut naître ov de rouoges cheveux
D’un péthe Indien, d’une méthe Juive ou Bretonne
Et pour grand péthe aver un Turc,
Un Japonais, un Suisse ou même un négre;
Tout l’monde le laisse; il est en r’pos.
Aussi longtemps qu’i’ vit en houmme intégre!
Qu’i’ s’sait bé coumme un ange du ciel
Ou laid coumme le matin esprit li-même,
San pedigree i’ n’est pas t’nu
D’exposer, p’t’être avec une honte extrème!
L’houmme ne dit pon d’y’où qu’i’ proveint:
Mais pour les viaux la chose est difféthente,
Et ch’est hélas! à nos dêpens.
Sans qu’la raison m’en s’sait trop appathente;
– A mains qu’che s’sait que j’valons l’mus!
Et que les hoummes, qui s’considéthent nos maîtres.
Sont réellement nos inférieurs –
Et oprès tout, i’ pouorraient p’t’être bein l’être!!

Prumié R’pas.

Ch’tait quand j’fù salèe coumme un lard
Qu’ma méthe, enfin, pu embrachi sa fille.
Mais dans p’tit d’temps, nou me r’halli..
N’faut pasles vaques aient autchune jouaie d’famille!
Mais ervenons à nos moutons…
Si ma vie d’vieau fut paisibl’ye et trantchille
Oulle ‘tait bein triste et sans pliaisi:
Dès l’prumié jour nou s’pathi méthe et fille!
Je fu’ pitchie à grenotter
Dans un p’tit coin y’où qu’le jour v’nait à peine,
Tandis qu’ma méthe, à san tout seu,
Toute attristèe, hallait de longues haleines:
La faim qu’menchi a m’digotter;
J’éthais voulu tetter, je m’mins à braithe;
Mais persounne ne s’en vint d’man bord
Pour me condithe à la stalle de ma méthe.
Le valèt vint ov un boutchèt
Et s’mins â traithe, assis sus sa scabelle,
Ma méthe, mârrie, le coup-d’pîsait:
Il avait bieau lis crier “Ouais, ma vielle!”
Ou faisait servir sa coue d’fouet
Ou’ l’is fichait raidde à travers la fache
(Il en juthait coumme un perdu)
Des laches – et pis de raidde bouannes laches!
I finit d’traithe, emportit l’lait,
Et frumit l’us en sortant d’dans l’étable, –
I’ r’vint au bu’ de tchics instants:
Mais êcoutèz de tch’est qu’i’ fut coupabl’y’e..
Il engambi dans man cottin
– J’pensais de l’vaie me condithe à ma méthe
Pour me laissi’ tetter en r’pos…
Hélas! nouffait. I v’nait pour me faithe baithe,
Pour me faithe baithe dans un boutchét!
Mé qui n’savais pas sus tchi plian m’y prendre
Je m’accliutchi dans un p’tit coin…
“Vé-t’en, s’fit-i’, j’m’en vais bétôt t’apprendre,”
I’ m’attrapi avec un bras.
En me r’gardant sans pitchi dans sa fache;
Et bein rud’ment, en m’capuchant.
Contre les plianches, m’env’yi a raiddé-brache.
Avec sa gambe contre man corps
I’ me t’nait bon, tout à fait immobile,
J’èprouvi bein à m’êcapper
Mais à tchi bon? Ch’tait d’la peine inutile!
Et tout d’un coup, j’senti sa main
Qui m’empoignait par le haut d’ma pouorre tête
Et i’ m’poussait l’mûsé en bas
En m’qualifiant de “Boustre-de-p’tite-bête!”
I’m’entonci l’nez dans l’boutchèt…
J’avais du lait amont les deux nâzilles
Mais pas moyen d’rein avaler
Quand nou-z’a peux, nou r’dégozille!
J’trembliais, j’souffliais, j’bouffais tout l’temps,
J’êcliatchais l’lait partout dans ma minzéthe
Mais j’êcouochais man pouor’ musé
Dans chu boutchèt sans parvenin à béthe!
Enfin, i’ m’pitchi deux d’ses daigts
Dans l’bord d’la goule et j’fini’ par comprendre
Comment chuchi au lieu d’tetter.
Oui, mais qu’j’avais en hannè pour l’apprendre!!

Le Malheur d’être Belle.

Ma vie entchiéthe a ‘tè coumme ch’la…
Tout ch’que j’aim’thais ou qu’je f’thais par natuthe
Les hoummes tréjous m’l’ont interdit;
Pour yeux, je sis une chose et pas une criatuthe!
Un bouan matin, avec pliaisi,
Je m’apèrchu qu’au front j’avais des cônes
Qui justement se faisaient jour,
Et j’en’ ‘tais fiéthe coumme une reine sus san trône.
Car les cônes sont pour le béstiâ
Chein qu’les chignons sont pour toutes les d’mouéselles
Et les moustaches pour les garçons;
I’font les boeu’s pus bieaux, les gn’iches pus belles,
Mes cônes craissaient à lus bouan gré:
I’n’taient p’t’être pon exactement patheilles,
Mlais tchil effet qu’ch’la peut aver
Sus chein qu’une vaque fournit pour dans la selle?
Et bein m’créth’ous quand j’vos dithai
Que pour mes cônes je subis un martythe
Es mains d’man maître et d’san valet –
Deux vrais bouochièrs, autant faut-i’ en dithe?
Un jour je v’nais d’mangi man fain
Et j’en avais occouo tout pliein la bouoche,
Quand i ‘s’en vindrent à côté d’mai
Avec chatchun lus râpe et lus brioche
Hélas! j’pensi, ch’est tout fini,
Me v’la ach’teu’ que j’sis bein grosse et grasse,
Comme le poulèt qui tuidrent hier,
A l’us d’la vie et i ‘faut que j’trépasse!
Mais che n’tait pas pour me sangni,
A ch’t’êgard-là, je n’avais rein à craindre;
Quoiqu’à m’n’idèe en véthitè,
Pour chein qu’i’ m’fidrent, j’étais autant à pliaindre;
Car m’attrapant entre les deux,
Mes cônes si belles, i s’mindrent, à raiddé-brache,
A gobill’yi et à coper
Ov lus brioches, en morcieaux et bédaches.
Ils app’laient ch’là “les affini,” –
Ch’tait là un plian pour les mettre rédghuliéthes,
Car de nos jours, ch’qu’est naturel.
Ne convient pus, faut l’faithe m’illeu’.. ou pliaithe.
Après aver don dolfitchi,
Râpè, frottè et copè jusqu’au jaune
I’ m’pitchidrent un espèce d’étau
Qui p’sait un pliomb et qui m’teurtait les cônes!
J’fu d’même attintèe pour des mais
J’pouvais à peine erléver ma pouorr’ tête.
Mais fallait bein enduther l’ma’
Et m’laissi vaie ov une si vilaine crête.

* * *

I’ y’eut pus tard d’autre embarras:
L’exposition. qui s’tcheiut dans la pâraisse
Les obl’yigi à m’prépather
Pour que j’fusse belle, à man r’grèt je l’confesse!
J’tais tout à fait bein dans m’n’êtat
Mlais ch’la n’tait pas suffisant pour le maître
J’n’eu’ pus un seul instant de r’pos
Sinon quand j’tais dans la vallette à paître.
A tout moment maitre et valet
S’en v’naient avec des bringes et des ècrédes
Et i’ s’mettaient à tigue-de-corps
Entouor de mé, sans interméde!
Souvent j’avais les lérmes es yièrs,
Quand une êcréde me capuchait la croupe
Ou qu’dans l’ouothèlle i’ m’bringeaient du,
Ou qu’i’ m’faisaient, sus l’épaule, de grosses loupes.
Touos les jours quand l’temps ‘tait mauvais
Ch’tait bringe, êcréde; – j’en’ ‘tais quâsi malade,
Pour mé, n’y’avait pus au tchun r’pos,
J’en perdais l’appétit: j’trouvais tout fade!
Si ch’tait là tout, ch’ne s’sait qu’mié ma’.
Mais ne f’chin chein qu’est piéthe occouo que l’reste:
Même pour not tchoeu’ n’y’a pas d’êgards…
Nou m’a mathièe à tchic un que j’dêteste!
Ch’est une horreur et j’n’en r’veins pas!!
Mais à tchi bon vouler montrer mes cônes?
J’n’y gangn’rais pas, ch’est bein certain,
Même sî j’briais coumme un vièr gramophone.

Responsabilitè et dignitè.

Man prumié vieau fut un p’tit boeu
(Il a déjà gangni l’prix d’la pâraisse
Et san portrait et san nom tout au long
Ont y’eu l’honneu’ d’pathaître dans la Presse).
Il ‘tait au monde ded’pis un mais
Quand Jean L’Brun vint me qu’si dans la Vallette
Le jour d’l’examen du Herd Book
Qu’avait ‘tè annoncè sus les gazettes.
Nou s’assembl’yi dans l’grand carrefour
Entre l’egl’yse et la salle paroissiale
J’étions, jé crai, quatorze en tout
D’vant les messieux d’la Société Royale.
Je n’eumes pas nus’, d’peine a passer
Et pour ma part, je veurs bein vos l’admettre
J’tais fiéthe quand j’ouï dithe qu’à l’av’nin
Oprès man nom, je portèthais deux lettres…!
Je n’le dis pas par vanité;
Coumme pour les hoummes, ch’est ètou pour les bêtes
Les siens qui gagnent le pus d’honneurs,
Sont extchusabl’yes si ch’est qui draichent la tête!

Cruautè et Injustice.

Je n’fu’ pas traite le ser de d’vant
L’exposition. – La nièt, j’fus mal à m’n’aise
Man lait sembliait p’ser d’pus en pus
L’piécho m’craissait en londgheur et en laize
Mes trans se mindrent à m’pitchi du,
I’ grossissaient et dev’naient duèrs et raiddes
Je piétinais mais à tchi bon?
A man malaise, ‘n’yavait qu’un seul èrmièdde –
Je l’savais bein et d’vant longtemps
Je n’pouvais pus y t’nin, je m’mins à braithe…
J’mé l’vi’ d’pus bouanne heuthe que d’amor
Espéthant qu’maître ou valèt veindraient m’traithe
Sus l’matin, j’les vi’ bein s’en v’nin
Avec couleux d’vanté canne et s’cabelle…
J’pensais qu’i’ s’en v’naient m’soulagi
Mais j’oubliais qu’faut souffrir pour être belle
Les filles et femmes le savent ètou
Dans lus habits qui l’s’empêchent d’aller vite,
Avec lus corps si raidde êtreint
Et lus pouorres pi’ds dans des bottes bein trop p’tites!
Et quand i’ mettent ches grands chapieaux,
Aussi grands comme les roeux de tchique chiviéthe,
Et les font t’nin ov de long clious
I’ daivent pus tard, j’sis seux, en être de pièthe!
Mé, qu’avais l’piécho piéthe que pliain,
Qui m’en trouvais déjà toute minzéthabl’ye,
Man tou’ n’vint pas: j’plieuthais d’dêpièd
En viyant traithe toutes les autres dans l’êtabl’ye.
Je fu bringie et em’nèe d’hors
Nou m’fit marchi une terribl’ye distance;
Sus le qu’min mes chabos bûchaient;
Si je n’les perdit pon, ch’est qu’j’eu d’la chance!!
J’souffrais-t’i’ sus chu trajèt-là…
J’trouvais qu’la route est bein autrement duthe
Que notr’ valette et notr’ grand prè,
Avec lus frais tapis de riche verduthe!
Ov sept autres bêtes nou m’fit marchi
Dans un grand’ tou’ endrait un fliotchèt d’monde
Tandis qu’des juges lus abusaient
A nos pinchi la couenne toutes les secondes!
I’ voulaient vaie châtchun d’nos points,
Et s’asseuther d’la grosseu’ d’notr’ lumiéthe,
Saver si nos trans ‘taient beins mins.
Et si j’avions d’bieaux quartchèrs de driéthe!
J’tais si lassèe oprès tout ch’là,
Que quand nou m’mins le prix pardessus toutes
Je n’y prins pon autchun pliaisi
J’pensais tout l’temps à mes deux milles de route!
Et m’en r’venant, ov le valèt,
Ma tête ornée d’ribans, je m’trouvais triste.
Le maître, li, ‘tait au dîner
Et il avait pus d’vingt pliats sus sa liste!
Pour nous, hélas! le sort est du,
J’gangnons les prix, mais ch’est d’autres qu’en amendent
J’enhannons pour faithe profiter
Des gens qui tout d’un coup nos vendent!
Tout l’long du qu’min en m’en r’venant
Je m’trouvais bête et p’sante coumme une baleine
Toute êcallèe et tout d’travers
Je n’gabathais qu’avec la pus grand peine.
Man pouorre piécho, tout gros enfliê,
M’faisait souffrir d’véthitabl’yes tortuthes
Et goutte à goutte j’perdais man lait
Car nou n’peut pas s’mettre au d’sus d’la natuthe.
Quand j’fu’ r’venue, enfin, siez nous,
J’tais certain’ment bein pus morte qu’vivante
Et j’n’avais pus le tchoeu d’penser
Au premié prix de tchi que j’tais gagnante!
Nou m’fliatti quand j’passi dans l’bèl
Et pis je r’fu’ condite à ma vielle stalle,
Nou s’mins à m’traithe – et pas trop tôt –
Car à mié-morte, je m’rouolli sus ma pâlle.
Nou m’baillit d’ieau dans un boutchêt
Et nou m’fliantchi une brachie d’grain d’Espagne,
Ch’tait là tout chein qu’y’avait pour mai
Mais l’maître, ailleurs, avalait du champagne!
Viy’ous l’contraste entre nos deux,
N’tait-che pon à mé que v’naient les rêcompenses?
Mais l’maître, hélas, mé gobait tout.
Ah, si j’osais vos dithe tout chein qu’j’en pense!!

L’inhumanité des hoummes.

J’ai ‘té minze au Concours Beurrier
J’ai gangni man Certificat d’Mérite
Mais pour l’aver que j’ai souffert
En avalant tant d’ingrédients qu’excitent!
J’ai l’estouma’ tout deslotchi
Et j’ai tréjous mauvais goût dans la bouoche…
Quand les hoummes veulent des mathes de lait
Les vaques, hélas! n’ont pas la vie bein douoche!
L’s’humains, tout d’même, sont-i’ cruels!
A bouan d’lus faits m’ont souvent fendu l’âme;
Mais à l’égard de man drain vieau
Man maître a yeu une condite pus qu’infâme!
Tout chein que j’eûmes à enduther
Es mains des hommes mé et ma pouorre vielle méthe
Quand j’vins au monde ‘tait mal assez;
Mais ch’est qu’l’av’nin m’en rêservait bein plaithe…
Faut que j’vos diche qu’un bieau matin
Quand, bein trantchille, j’étais dans l’clios à paître,
Je vi rond’ment s’en v’nin d’man bord
Deux êtrangièrs en compagnie d’man maître.
Je l’vi la tête et m’mins à ruminer.
Ils appréchidrent en pilvâtchant men’ herbe
Et s’apitchidrent à me r’garder:
Viy’ous, s’fît l’maître. Oulle est superbe:
Les êtrangièrs ne disaient mot
Mais i’ m’trouvaient tout d’même assez passabl’ye,
Car tout d’un coup sans m’en dghèrni!
Les v’la à faithe un bardghin dêtestabl’ye!
– Man vieau ‘tait pour v’nin dans huit jours
Et que ch’fusse boeu ou bein que ch’fusse géniche,
Ils acat’taient méthe et êfant!
Faut-i’ souffri’ pour le pliaisi des riches!!
Ch’tait des marchands Améthitchains
Mais Jean L’Brun t’nait à conserver ma race. –
Par intéthêt, ermèrtchiz bein,
Pas par pitchi, l’houmme n’en a autchune trace..
I’ lus dit don, qu’si ch’tait un boeu,
Ni vaque ni vieau n’sortithaient de s’n’êtabl’ye;
Si ch’tait une g’niche, i’ vendrait bein
Sait méthe ou fille pour un prix raisonnabl’ye.
Monstre qu’il est: d’vant qu’i’ vaie l’jour
Vendre un êfant, pour le s’pather d’sa méthe!
Ou la méthe pour l’env’yer au lliain
Plieuther trèjous les siens qu’ou laisse drièthe.

Tortuthe et Exil.

– Ch’fut une géniche… J’en eu’ l’tchoeu gros
En me r’souv’nant d’chu bardghin satanique
– Ma pouorre êfant reste en Jerry
Et nou m’exile, toute seule, en Améthique!
J’m’en vais pour ne r’venin jamais
J’ne r’verrai pus nos clios ni notre êtabl’ye;
J’ne r’mettrai pus les pi’ds ichin;
La loué m’le d’fend. N’est-che pas abominabl’ye?
Et pis j’entends que d’vant m’n’aller
Faudra subir les pus affreuses tortuthes…
Jusqu’à une plièche app’lèe Springfield
Nou m’chabol’la dans tchique sorte d’vétuthe.
Un houmme ov un grand blianc d’vanté
Dait m’enfoncer une adjulle longue et fine
Bein liain dans l’co – pour m’êprouver
Et se faithe seux qui n’y’a pas d’ma’ qui m’mine.
I’ sembliéthait qu’ché s’sait assez.
Helas, nouffait! I’ prendront un fer rouoge
Et m’brûl’lont d’tchi sus y’un des pi’ds –
Et m’capuch’chont sans doute si ch’est que j’bouoge!
I’ s’en vont m’faithe étou un creux
– Ov un gimblet, j’crai bein, – dans un ouothelle
Pour mettre une pliaque à numéthos
Et faut qu’j’enduthe des actions si cruelles!…
– J’tchitte ma patrie, et mes êfants,
– J’men vais parce que j’tais belle et bouanne laitchiéthe,
– J’sis vendue car j’faisais d’man mus…!
-Dans une autre monde, je trouv’thai man chim’tchièthe.