Chennechîn est l’scrit d’eune Lettre Jèrriaise d’sus l’radio y’a tchiques années. Chu scrit n’fut pon êcrit pouor la publyicâtion mais pouor l’aîgue du pâleux, l’Sieur Laisney.

Here’s a script from one of the regular radio talks from a few years ago. Mr. Laisney’s script wasn’t written for publication but as speaking notes.

Couomme normale, ch’est un pliaisi pour mé Clifford Laisney d’vos presenté la Lettre Jerriaise Aniet Samedi 1’21 d’Avri 2007.

J’avait ‘tait trejous mon d’si que si Dgieu m’permettait, que j’authaits vêtchu jusqu’a l’année 2000 en orde de celebrer arrivée du nouvieau sièclye. Eh bein sept ans lus sonts passés et Dgieu mercie, j’sis acquo ichin, mais malheutheusement sept ans pus ancien, et j’vos assûthe que les membres et muscles m’en r’souveinnes auve regularité. Mais malgré tout, le chèrvé et l’s’idées fonctionnent raisonablyement bein.

Dans une tchinzaine de jours, j’allons etre acquo une fais a celebrer la liberation de chinq longues années d’otchûpation. Chinq années d’déprivation et d’gêne en des cas des gens n’savants pas de iou qu’el prechain r’pas allait v’nin. Le temps s’apprêche tchi i’autha p’tit nombres d’gens survivant la dernié d’gerre, et chès bein important que plusieurs gens onts ieu la presence de r’corder lus memouaithes de chés temps sombre.

Malheutheusement, toutes histouaithes de l’otchupation nons pas ‘tait écrites par des gens tchi survites chés temps. I ionts a tch’in ‘taits même pas nées, d’autes tchi d’meuthaites hors pays, et couomme ch’la lus accountes ‘taits de s’conde main. Le resûltat d’erchèrche en bein des cas n’est pas un accounte des personnes tchi enduthites ches longues années.

Ch’tait auveune surprinse pliaisiblye i’a tchique semaines que j’erchumes dans la poste un patchet contenant un livre intitué ‘My Family’s Darkest Days 1939-1945’.

Ch’ést un livre tch’a ‘tait écrit par un ami a nous, Le Sieur Wilson de la Mare. Wilson n’avait q’dgiex ans quand la dgerre se décliarit. La fanmillye ‘De La Mare’ d’meuthaits a la ferme connue couomme ‘Egypt’ sus la côte des Pliatons a La Trin’nté. Dans s’n’accounte i nos r’souvins des mots du Ministre Prime du jour, le Sieur Neville Chamberlain, announcants qu’a cause du débaclement d’négotitations entre l’Anglieterre et L’Allemagne, dgerre avait ‘tait decliarée entre les deux pays.

La Dgerre ayant c’mmenchi dans l’est de 1’Europe avanchi rapidement vers La France, et 1’19 de Juin 1940, le Gouvernement Angliais announci au peuplye qu’a cause de donnmage et dangi és civiliens, les iles de la Manche ne sthaits pas d’fendues.

Wilson dans s’n’accounte nos dgide le travers du temps d’l’évacuation quand envers 8000 gens décidites d’évacué d’ile. I nos r’souvins des occasions quand les bombes déscendites sus la Cauchie et a La Rosque tûant et blièssants un nombre d’civiliens.

Ch’tait les premié jours de Juillet 1940 que les forches d’otchûpation fites lus appathence en Jerri. Dans p’tit d’temps maisons et hotels fûtes otchûpées par les soudards, et les vetûthes des civiliens fûtent stationnées a Springfield.

La d’meûthe de la fanmillye De La Mare etant prés de la côte ‘tait dans une contrée connue couomme le Zone Militaire. Y’avait un couvre-feu tchi restricté l’mouvement d’gens. Etant une ferme isolée signifié une importance a l’artill’rie,et nos visiteurs fûtes pas longtemps devant faithe lus presence connue.

Seulement quarante-huit heûthes d’averti fût servi pour la fanmillye d’évacué la ferme contenant bestieaux, meublye, recoltes en terre, ôtis etc. Auve l’aiidge du connétablye, une maison abondonnée par les troupes lus donnit accomodation pour le temps.

Anmins et vaisins vintes a lus s’cours. Tout l’meublye, éffets d’ferme,et même les recoltes d’avoût fûtes transportées en temps pour l’arrivée d’nos messieurs. Dans p’tit d’temps la maison devint demolie par l’artill’rie. Dans chés sombre jours
d’otchûpation y’avait une camarderie, une réalisation de s’entre aidgi parmi les gens, que malheûtheusement j’avons appathence d’avait perdu.

Le livre cont’chien hardi d’autes épisodes de la vie suous l’enn’min. I’a hardi d’references entuours les prisoniers escliave tch’avaits bein p’tit d’nouorritude quouaiq’ i fallait travaillyi dû. J’pourrais continuer avos raffraichi des memouaithes a Wilson mais une chose, mon temps est eschû sus Radio Jerri, et I ‘autre raison est que j’vos r’ccommande de liethe le livre vous-même. J’ai trouver l’s’accountes simplye et aisi a suivre, et etant un survivant d’l’otchûpation couomme une grand proportion des gens tchi m’écoute aniet, j’peut identifié et accorder auve les memouaithes du redacteu.

Mercie Wilson.

et Mercie etout a tuous d’vous tch’écoute la Lettre Jerriaise.

J’vos souhaite une bouonne semaine.

A LA PRECHAINE.