Né v’chîn l’texte d’aniet d’not’ auteu du mais, Henry Luce Manuel:

Here’s today’s text by our author of the month, Henry Luce Manuel:

I.

Tu n’tais qu’une Angora, O ma Minette!
Et s’lon bein des gens Cat no’s est env’yé
Seul’ment pour t’ner compagnie à filiette
Qu’est restée seule à certain temps dounné:
D’vant l’feu, ov’ ticle à iau qui bouor, chanter;
Et, ches puores mioches, des suoris, tuer.

Marjing’! mé, je n’sis pas de chut avis!
Cheque Cat peut être tu m’as montré;
Fidèl’ comm’ Chen, – et genti coumm’ Brebis, –
Quasi coumme Efant aimant et enjoué,
Et, si bein traité, cherchant p’us à pliaire
Que presqu’ tout l’monde ov’ qui j’avons à faire.

Ausin, ma Minett’, quand je t’ai veue morte,
Quoiq’ rein d’pus qu’une Catte tu n’étais,
Mon queur m’a dit: “O une amins est orte”
Et honte de l’dire j’n’airai jamais,
Que quoique ès lerm’ je n’sis pas adounné,
Ta mort, ma Minn’, m’en a fierrement halé. –

II.

Je n’veux pas inventer auchune histoire
Et n’dirai pas que sans méchet tuétais
Ah, ma vol’ress’! Tuérais ieu du’ à faire
Si tuavais paru d’vant Moussieu L’Gallais!
Mais, qui? ch’tait ta natur’: Cat est voleux,
Coumme âge est bavard, et mintin trompeux.

Tuétais, ma Minn’, nature et vérité;
Et si la première avait ses faiblièches,
Tout par l’autre était p’us que racaté, –
Chest pour chla que j’aimais tant tes caresses!
O en té n’yavait pas de faire accraire,
Ch’tait sans calchul que tu cherchais à pliaire.

Même agonisante i’m’ paraît te vais:-
J’apprèche; O que tu souffr’! – Sus ta bell’ tête
Je mets ma main trembliant’; tu me r’counnais;
Tu fais un dernier effort, ma p’tit’ bête,
Pour montrer comme oquor’ tu m’aimais bein,
Et, d’vant muorir, ta lang’ m’efflieur’ la main. –

III.

Ouesq’ tuès ach’theur’ ma p’tite empoisonnée?..
“Dans le grand rein!” orgi d’homm’ répondra –
Mais êch’ bein seure? chose qu’est crée
N’est i’ pas seu tréjous existéra?
Or, en quiq’ nouvell’ forme, en aut’ plianete,
Qui sait si tu ne r’vis pas, O Minette!

Si chen est d’mêm’ continue à montrer,
(Si l’homme est té’ là haut coumme ichin bas,)..
Qu’anima’ peut leçon de queur dounner,
Et qu’Homm’ peut prendre exemple mêm’ de Cats,
Qui vo’s gratt’ront, si chla s’adounn’, quiq’ fais,
Mais, fauss’ment n’f’ront sembliant d’aimer, jamais

En vers qui près de p’us d’un feu s’front liaire,
J’ai voulu fair’ de mon mus, ma p’tit’ Minne,
Pour qué nou rende honneur à ta memouaire –
Des Grands du monde en ont ‘té bein mains digne!
Lius nom éra ‘té longtemps oublié,
Quand l’tien, Minett’, s’ra èmuement chanté!