Né v’chîn l’texte d’aniet d’not’ auteu du mais, Amelia Perchard:

Here’s today’s text by our author of the month, Amelia Perchard:

Av’ous oui cha qui s’arrivit –
L’fracas siez nous la s’maine passee?
J’f’thais mus d’vos raconter l’histouèthe
Du c’menchement, pour qu’ou l’appréciez –
Pépée acatit un moto
Y’a justement huit s’maines aniet
Tout fliambant neu et erlisant,
Ch’est qu’il en était fi, valet !

Tout fut bein eune tchinzanne de jours,
Et pis ch’tait là que l’fonne c’menchit,
Quand m’mée did un sé en soupant
Qu’ou s’n’allait apprendre à cachi
“Ah, dame, pas dans man neu moto,”
Se fit Pépée d’eune vouaix d’futhie,
“Auv’ toutes les femmes sus rouelles à ch’teu
Nou n’est pon en saisete d’sa vie !”

M’mee n’entendait pas d’ch’t ouethelle là,
Et dit que si ch’était là l’cas
Qu’oulle en acat’tait iun lyi-même
Avec tchiqu’uns des sous d’ses gens.
Le surlendemain auprès diner
Un moto vint à la maison
Et ou’ montit auv’ le cacheux
Pour aver sa preunmié leçon.

Par mêcredi la s’maine passée
Oulle en avait ieu chinq ou six
Et l’arlevee dans les trais heuthes
Ou’ d’vin’nez jamais cha qu’ou fit.’
S’moto à P’pee ‘tait dans l’garage –
Et le bouan homme ‘tait au paîsson –
Quand ne v’la M’mée qui s’êmancipe
De l’cachi tout l’tou d’la maison.

Ou’ montit d’dans et l’mint en marche –
Ou’ n’avez janmais veu pathelle –
Faisant des sauts comme un bichot
Ou’ parvint d’dêhaler dans l’bel
Toute fièthe, auvec l’engin ronnant
Comme un essaim de môques à mi
Ou’ filet avan l’bel, valet,
Comme si le dgiable ‘tait souotre lyi.’

Dans l’même instant not’ vieille cannotte
Appathut d’driéthe un péthyi,
Et tachant d’l’éviter, Mémée
Cachit tout drait dans l’poulailli
Le seul bonheu de ch’t’avârie
Eit qu’ ch’la fut fait dans un clyin d’yi
Et qu’la pouorre cannotte et les poules
N’ eûtent pon, bein saieux, le temps d’souffri.

Je’n m’en vais pas vos faithe l’affront
De rép’ter cha qu’Pépée dit,
Mais crijiz-me quand – e – j’vos dit
Qu’i’ n’ fut pas r’gardant auve ses d’vis
Il en dêclianqûtit d’toutes les sortes
Que j’avais vraiment r’gret pour m’mée, –
Ah, comment qu’not’ vie à changi
D’pis Mêcredi la s’maine passée!

M’mèe n’a pas r’te pour de leçons –
La pouorre cannotte est enterrée –
Les restants de not’ bieau moto
Au garage ont té entrainés –
Les poules qu’ êcappîtent le machacre
Font la paigniolle à londgeu d’temps –
Ch’la montre coumment qu’le cours des choses
Peut être changi dans deux instants.