Né v’chîn l’texte d’aniet d’not’ auteu du mais, Amelia Perchard:

Here’s today’s text by our author of the month, Amelia Perchard:

Les garçons, danme n’m’en palez pon.
J’n’ai janmais veu patheils!
I’ n’ ont ni manniéthes, ni principe –
I’ n’lavent pas lus ouothelles!
Les av’ous veus s’n’aller s’traînant,
Lus salles mains dans lus pautes
Et coumme s’i’ sont tellement lâssés
Qu’i’ n’peuvent pas marchi d’autre?

Nou dithait qu’ch’est tout lus pliaîsi
D’etre coumme des êpeûthas.
Et janmais dé lus dêrangi –
Vraîment, j’les comprend pas!
Ou n’verrez pas des filles d’lus age
Janmais sorti d’siez ieux
Sans être propre et bein habillies
Et aver grée lus g’veux!

Les garçons pouorraient faithe bein piéthe
Que d’prendre patron sus nous
Pour apprendre à lus comporter
Et aver un mio d’goût!
Faudra qu’i’ changent devant d’être grands
Car, bieau qu’iun d’ieux m’voudrait
Ch’s’ra pas me qui m’abaissitha
À m’ mathier à d’ ite!