Né v’chîn l’texte d’aniet d’not’ auteu du mais, Amelia Perchard:

Here’s today’s text by our author of the month, Amelia Perchard:

Coumme ch’est la mode d’aller à ch’va
J’pensi que j’f’thais d’man tchian,
Y’en avait iun la s’maine passée
Àvendre-e à l’encan.
J’m’en fut pour vaie chutte noblye bête
Dêterminé d’l’acatter
Espéthant que J’pouorrais l’câchi
Et qu’i n éthait pas d’feu.
Quand j’le vis mâté la chutte pouorre bête,
J’eu si grand pitchi d’li j’vouli li faithe la fête,
I’ semblait saver au j’avais ergret
De l’vaie si minséthablye,
Et d’plîaisi i’hinnait.

Je n’hésiti pas quand l’temps vins,
J’mins sus le ch’va le préunmi,
Et l’encanteur r’gardi deman bord auvec un p’tit souosrit
S’ou l’voulez pour aller à ch’va
N’vos gênez pas i’ me dit
Janmais ou n’tcherrez d’sus sans dos
Chounna j’vos garantis.
Tout l’monde rathaissez être amusées,
Et me je n’fut qu’trop prêt
D’en payi trente chelins.
Le t’nant à londgeu d’bras par san crin
J’m’en fut à pid siez nous
Tout fyi de man bardgin.

J’soummes dev’nus bouan anmins les deux
Depis que je l’acatti
Mais j’n’ai pas accou monté d’sus
Faudrait on appréchi
I’s mâte sus ses deux pids d’driethe
Sa coue va coumme un moulin
Ses ièrs pétillent et i’ coudpise
Aussitôt qu’i m’ouait v’nin.
Ah chutte vielle quedolle
Qu’il est têtu
Coumme un vièr sou-ou-dard
J’ai des bliessieuses partout.
Chut vièr carcan faut qu’j’ai l’aud’sus li
Et j’montrai sus san dos quand j’dev’thait en mouothi.