Né v’chîn l’texte d’aniet d’not’ auteu du mais, Amelia Perchard:

Here’s today’s text by our author of the month, Amelia Perchard:

Dgilliaume lé Contchéthant – en mille souoxante-six,
En mille quatre-vîngt sept, ch’tait Dgilliaume san fis;
Henri, lé préchain sus l’trône en onze chents,
Fut suivi d’eune liste deux fais longue coumme lé bras
D’rouais et d’reines qui fallait qu’nou-s-apprînsse par tchoeu,
Qu’nou répétaît en rînme pour s’en ramémouaither,
Quand nou-s-‘tait a l’êcole – hélas, tchille embête!
Janmais jé n’pus, mé, les fouôrrer dans ma tête,
Sinon Dgilliaume, brave Duc dé Normandîe,
Qui d’vînt Rouai d’Angliéterre en mille souoxante-six.

J’avais raison d’m’en rappeler, j’vai bein a ch’t heu,
Dé Dgilliaume et s’n armée qui crouaîsitent la mé,
D’St. Valéry dans dgiex-sept chents batchieaux dgerre,
Pour lus battre dans l’pays êtrange d’Angliéterre;
Car n’y’a pas d’învention dans tout l’monde entchi,
Dans la scienche, l’ingîn’nie, ou n’împorte tchi,
Qu’a tant changi l’cours dé not’ vie, jé dithais –
Bieau que j’ayons tréjous resté bouans Jèrriais –
Coumme la victouaithe dé Dgilliaume et dé s’n armée,
Lé quatorze d’octobre, y’a neu’ chents ans ch’t’ année!

Où’est qu’jé s’saîmes, jé n’sai; av’ous pensé à ch’la?
Mais pus important, tch’est qu’jé s’saîmes, don, ah ça?
Ch’s’sait-i’ Français ou Normands? J’mé d’mande tchiquefais
N’y’a rein d’garanti qué j’s’saîmes même des Jèrriais! –
Si Dgilliaume n’avait pas entréprîns la tâche,
D’envahi chu pays d’l’autre côté d’la Manche.
Jé s’saîmes pe’t-être Allemands d’pis la dèrnié dgerre,
Si j’n’avaîmes pas ‘té alliés a l’Anglîéterre,
Et qu’les Îles n’avaîent pas ch’t hounneu mangnifique
D’être preunmiéthes a faithe part d’l’Empire Britannique.

Combein d’autres tchestchions qué nou pouôrrait d’mander
Si nou restait tchîques minnutes à y penser!
Aniet, don, par exemplye, tch’est qu’jé s’saîmes à faithe,
Au lîeu d’être ichîn tous, en trains d’nos distraithe?
J’éthaîmes-t’i’ not’ libèrté, et lé drouait d’vouaix,
D’êcrithe des lettres à la Gazette, s’i’ nos plîaît?
Sans doute, nou trouv’thait sans peine tchique caractéthe
Prét a entrinner qu’nou n’pouôrrait pas être piéthe!
Ch’est p’têtre aussi bein qué jé n’lé savons pas-
N’y’a pon trop a r’dithe des dèrnié neu’ chents ans!

Tchi changements qu’i’ y’a ieu, d’pis mille souoxante-six!
S’il allait r’vénîn, Dgilliaume dé Normandie,
Il éthait bouanne raison d’être êpouvanté
Par les choses modèrnes qui rempl’yent la vie aniet.
Tout cheîn qui nos reste avaû l’s années, j’dîthais,
Et qu’i’ pouôrrait comprendre, est not’ vièr Jèrriais,
Mais n’faut pas oublier qué j’soummes chein qué j’soummes
À cause d’la hardgièche, y’a neu’ chents ans, d’un houmme
Quî changit l’cours d’not’ vie! Ch’tait not’ destinnée
Et, par lé Duc Dgilliaume ou fut asseûthée.