Né v’chîn l’texte d’aniet d’not’ auteu du mais, Ph’lippe Langliais:

Here’s today’s text by our author of the month, Philippe Langlois:

Ch’est une histouaire assez touchante
Que j’m’en vais vouos conter,
Et s’i’ vouos pllait que je la chante,
Ous pouvez ecouter.
Jean et Manon elevès ensemblle
Depis qu’ils ‘taient efants,
Etaient etou à chein qu’i’ m’semblle
De pus d’un bord parents.

I’ furent siez une maitresse
Pour apprendre à êp’ler;
A l’egllise de lus paraisse
Touos deux allaient prier:
Grandissant l’un à côtè d’l’autre,
Ous n’serez pas surprins
Qu’un biau jour, d’amour l’un pour l’autre
I’ s’trouvirent êprins.

Comme i’ n’avaient pon d’héritage,
Ni d’prospect d’en aver;
Pour pouver se mettre en mênage,
Jean s’en fut à la mer:
Par malheu’ dans une tempête
Emportè hors le bord;
Manon d’chagrin perdit la tête
Pllaignons lus tristre sort.