Né v’chîn l’texte d’aniet d’not’ auteu du mais, Ph’lippe Langliais:

Here’s today’s text by our author of the month, Philippe Langlois:

Le ptit êfant veurt un tétin,
I’ n’a pas d’autre envie;
I’ n’faut qu’dormir ser et matin
Et haller à la vie:
Une fais braisi le garçon
Est envyé à l’êcole;
Là il apprend quique leçon
Et tout pllein de jouôrole.

Quand nouz est jeane et bein portant
Nou rit, nou joue, nou gnole;
Nouz est tréjous tambour battant
Et d’amour nou raffole:
Volant comme les papillons
D’une flleur à une autre,
Nou pense pus à cotillons
Qu’à priere et pâtnôtre.

Quand nouz a perdu de ses feux,
Que nouz avanche en age,
Nou deveint pus ou mains serieux,
La condite est pus sage:
Nou passe de bein douz instants
Au sein de sa famille,
Tandis que nou veit grandissant
Seit garçon ou seit fille.

Quand nouz arrive à ses viers jours,
De septante à huiptante,
Nou ne s’occupe pus d’amours,
La nature est mouorante:
Il est temps d’faire sen salut,
En continnuant à vivre
Du mux que nou peut jusqu’au but,
Quand la mort nouos delivre.