L’auteu du mais: châque mais en 2015 j’allons bliodgi des textes d’un auteu Jèrriais. Not’ auteu du mais d’Juîn est Jean Sullivan (Jean Sullivan 1813-1899).

Author of the month: each month in 2015, we’ll be blogging texts by a Jèrriais author. Our author for the month of June is John Sullivan (Jean Sullivan 1813-1899).

Salut! salut belle patrie!
Té qui fut mes premiers amours,
Té que j’adouore Ile chérie
Té que j’adouorerai tréjours.
Entend préluder sus ma Lyre,
L’air triompha de tes esfants
Qui d’un accord vainnent te dire,
Patrie accepte nous serments.

Chest pour Gerry nouotre belle Ile,
Qui nos faut tous former des voeux,
Car chest un Temple, un doux asile,
Chest un Eden béni des Cioeux.
Sus ces costils, gardins de Fliore,
Nou vait présider Appollon,
Et sa fille la belle Aurore,
A san Palais dans chu vallon.

Quand je vai tes belles campangnes,
Tes chausmières et tes châstiaux,
Tes fils ov lus douoches compangnes,
Tes ports et lus nombreux batiaux,
J’accliame au bonheur à l’aisance,
Qui naît de tes brillants progrès;
Je chante: oh lieu de ma naissance,
Réjouis té de tes succès

Oh! piesses tu brillir oquore,
Belle Perle de l’Ochéan!
Protège-la, Gieu que j’impliore,
De mes voeux chest le pus ardent.
Fai dan qu’ou sait tréjours prospère,
Et qu’à jamais les Pavillons,
De la grande et noble Anglieterre,
Protègent ses fils, ses sillons!

Gerriais pour nouotre Auguste Reyne,
Adréchons tous à Gieu nos voeux;
Piesse sa glouëre souveraine,
Erchever san lustre des Cieux.
Loyiautai té qui nos annime,
Entonnes nouotre Alleluia!
Chantons d’unne voiex unnanime
“VIVE LA REINE VICTORIA.”