Tchès qui s’en vint au Show? que j’dis a nos gens, Jeudi passé, après dèjeuné – eunne om’lette d’oeus d’France ov des chives minchies m’nu et un morcé d’saumon qu’Laizé avait acaté bouan-marchi, la séthée de d’vant, viyant qu’il ‘tait un mio rouètre – Tchès qui s’en vint au Show d’Bêtes?

Toutes les deux ‘taient d’avis de v’nin vaie cheunna. Laizé pour poué èschangi tchiq’ patholles a ses counnaissances des hautes paraisses; Lonore pour lus montré san neu chapé et vaie si y’éthait d’pus belles pleummes que les siennes.

Mais che n’fut qu’après dîné que j’nos montrîmes. N’y’a rin a vaie dans la matinée touos les fils d’fermi sont si otchupés a faithe r’lizé les cones de lus vaques, qui n’sé dèstouonne pon pour vaie passé la pus belle fille du Show. Ch’n’est qu’l’arlevée, quand l’Gouverneux et tout l’grand monde y sont, qu’nous a eunne chance d’être érmertchis. Nou s’faufile parmi yeux, nou s’pousse de l’avant, et nou s’y prend d’sorte de s’assiéthe dans l’enclios rèsérvé ès visiteurs de distinction.

Y’avait un peupye! Après avé chouèzi deux bouonnes tchaises pour mes femmes, et lus avé dit de n’pon bouogi d’la pour tchiq’ temps; j’m’en fut buzardé a l’entou du terrain, vais les vaques qu’avaient gagni, et oué les fermiers s’entre nâdgi sur les jug’ments des juges.

Mais sou voulez savé ch’qu’en est d’un Show, ch’n’est pas driéthe les bêtes qui faut se t’né; ch’est souos la tente a Mess Couillard qu’nous en apprend l’pus! Ch’est tréjous là que j’vais, mé, quand j’veux savé tchès qu’en est. Es siens qu’avaient gagnyi j’disais que jommais nou n’avait veu miyeu jug’ment – ès perdants j’disais qu’par les temps qui vont, nou n’peut s’fié a persounne! et qu’si j’avait ‘té mé qu’éthais ‘té juge, lus vaque ethait yeu ch’qu’ou méthitait. La d’sus les fermiers disaient “here’s luck!” et nou s’ent’ faisait des clyins en disant qui faudrait qu’y’eusse du chang’ment l’année tchi vint.

Au bu d’eunne pôse, tchiq’ un dit qu’autant faithe y fallait allé vaie la parade; mais quand j’vînmes dehort, tout ‘tait fini, et ils ‘taient a d’livré les Médalles! Bonté d’la vie! que j’pensi; tchès qui s’a dev’nu d’mes femmes? et j’mé faufilli bin vite du bord ou-ès que j’les avais minses. Moussieu Matthews ‘tait a faithe san speech d’amor, et Lonore, ma fille, ‘tait pitchie d’bu, sus eunne tabye, a crié hourras! “Veur tu bin vite té d’vallé d’là! que j’lis dit en la prennant a ma brachie; et ou-ès qu’est ta mémée?” Ou n’en savait rin! Mais j’la r’trouvîmes en l’heu, sous la tente a beurre! Ou voulait en acaté un lot pour mettre en pot! Eh bin! Oul en acati un lot a vingt-deux sous la livres, paids anglyais. Y’en avait vingt-très livres, a ch’que dit l’clèrque; mais, chose èstrange! quand j’vinmes a le r’pesé siez nous, a la rentrée, j’en trouvîmes quarante-tchun livres! Sans nos en apperchuvé, y’en avait tchée un autre lot dans not ponyi! J’avons du beurre pour tchi’ temps!

J’ai oui dithe dépis qu’y’eut du bri avec un autre acateux qui orétendait n’avait pas san compte. Mais Laizé est d’avis de n’dithe mot. Qui lus ramassent!

Piteur Pain
30/5/1913