Il est d’èrtou – auve un tas d’menn’ties!
He’s back – with a tissue of whoppers!
Man pouore pépée est dé r’tou. Y nos r’vint avant hier par lé baté d’Cart’ret. Et dans tchi’l èstat! Man pouore pépée. La fache enflyiée, la maintchi d’ses ouisqueurs tralées, et habiyi en chiques coumme eun èspeuthas. V’la ch’qué ch’est qu’d’envié des forgeux accaté du papi en France! “Never no more” dit mémée. Quand bin mème j’dév’thaimes perdre la plieche qué j’avons sus “l’Morning News” et avé a dèsmenagi d’ichin. Never no more en France sans mé, a dit mémée.
“Et ouès qu’tu’as té pour té met’ dans ch’t’èstat la, man pouore Piteur? s’fit mémée quand y nos ram’nîtes dans eunne van, sans casse, ov eunne fallyie tunette sus la tête, un châle atouore du co, et des viers slippeurs ès pids: tchès qui t’a mins dans ch’èstat la?”
Ch’fut ov assez d’peine qu’pépée put nos dithe sa malheutheuse avantuthe, car eunne pierre en tchiyant y’avait d’pichi très dents. Y pathait don qu’un Dinmanche matin, dans la ville y’ou qu’il avait ‘tait envié pour accaté du papi pour la “Morning News,” qu’en s’proumnant y s’trouve endrét eunne Chapelle. Il entre: lé Prédicateu en ‘tait au sermon (un bin bouon sermon, a dit pépée) et ch’tait quasi fini, quand né v’la tchiq’un qui crie: Au feu! Quasi tout l’monde sé sauve déhors, mais pépée, plien d’couothage, hale sa casaque et sen veste, et s’met brav’ment a lus aidji a èsteindre le feu. Eunne poutre lis tchet sus la fache, lis romp les dents; et, quand tout fut fini, casaque et veste, montre, bourse, et titchet pour r’véné, tout ‘tait fliambé: jusqu’a ses bottes qu’avaient trallé sur ses pids. Y fûtes oblyigis d’porté pepée jusqu’a s’n’ hotel, d’y’ou qui nos télégraphi pour siex louis pour s’en r’véné. Et lé v’chin r’vénu – mais avrôné, man pouore chiér pepée.
Mais, Never no more! s’fait mémée, n’rîtha en France sans yeunne dé nous. Et ch’est pas tout cheunna! mais tchès qui s’en va payi les frais? Ch’ t’ait au service dé la gazette qu’il ‘tait; et, coumme dit mémée, ch’est pas tout cheunna! mais tchès qui s’en va nos remboursé sa montre perdue, un tout neu fat d’habits brulées, et très dents dé d’vant èsbrédlées? Sans doute, lé prédicateu a promins a pépée d’faithe eunne collecte dans sa chapelle sitot qu’ou s’sa r’bâtie; mais v’la tchi prendra du temps, sans conté qu’dans sa presse, il oublyi dé d’mandé not’ adress a pépée, et qu’pepée n’sait pon seulement san nom. Ah’ mes pouores anmins, ch’qué ch’est qu’la vie! J’éthaîmes p’t’être mus fait d’resté forgi à Saint Jean.
Poscrippe. – Et mé qu’étais pour èscrithe des vérsets d’temps en temps! Tchès qui peut met’ san tcheu a èscrithe des vérsets, j’vos d’mande, quand nou’s a un péthe en brédelles au liet, et qu’san Bos fait l’train pour savé tchès qu’ést dév’nu d’sa quartchaison d’papi.
Morning News 22/9/1911