1974, L’Assembliée d’Jèrriais:

Vendrédi, l’1 dé mars, la rêunion mensuelle eut lieu dans la Salle Pârouaîssiale dé St. Jean et dans les souxante membres lus y rêunîtent.

Lé rapport dé la Séthée d’Noué et l’sien du dîner annuel fûtent lius et acceptés; la correspondance fut liue et chînq nouvieaux membres fûtent élus.

Les affaithes finnies lé Président, lé Connêtabl’ye W. J. Tomes, mînt lé restant d’la séthée dans les mains du Connêtablye G.A. Le Breton, qui montrit des magnifiques portraits sus l’Sud d’l’Afrique quand il avait ‘té auvec lé “Tour dé la Gâzette”.

Auprès aver prîns l’avion à chînq heuthes, lé parti attèrit à Sal Island à mînniet pour trais quarts d’heuthe, et dé d’la à eune heuthe lé matîn pour Johannesburg à 8 heuthes et d’mie lé lendemain. Lé pilote avait ‘té oblyigi dé changi la course à cause d’eune tempête.

Rencontre

Moussieu L’Bréton et Moussieu L’Mâsuthi et les danmes fûtent rencontrés par Moussieu Grisel, un marchand d’bêtes, et eûtent l’opportunité dé vaie sa fèrme et les bêtes dé Jèrri.

Lé parti fut trais s’maines et d’mie hors. Johannesburg n’est pas eune vielle ville, mais a ‘té r’bâtie dans les 60 ou 70 ans. Y’a un théâtre à l’ouvèrt. Les maîsons et bâtisses du gouvèrnément sont îmmenses et dans des bieaux alentours.

Lé gouvèrnément siège six mais à Pretoria et six mais à Capetown.

Lé labouothage est fait auvec des bêtes; pour ieux, ch’est là lus vie.

I’ fûtent à travers eune rêserve et les bieaux animaux qué les membres vîtent – des zèbres, giraffes, marmousets, les êléphants – qui crouaisent la route à lus aise, et les vouaituthes sont oblyigies d’arrêter pour ieux. Y’a des rhinocéros qui pèsent trais tonnieaux et peuvent couôrre à 30 milles à l’heuthe.

Les natifs

À Durban i’ y’a des tortues dé six à sept pids à travèrs.

Les membres vîtent étout la Vallée des Mille Monts, et les natifs dansîtent pour lé parti; des gens bein civilîsés, et les êfants sont si aimabl’ye.

À Capetown amont un “cable car” pour “Table Mountain” – ch’est lé pus long câbl’ye du monde pour amonter eune montagne – et les membres vîtent l’hôpita où’est qu’la preunmé opéthâtion fut faite pour lé tchoeu à être transplianté.

I’ y’avait étout des portraits des “Victoria Falls”, prîns dé deux côtés, dé Zambia et Rhodésie. I’ sont 300 pids d’hauteur et un mille un quart dé long.

Ch’tait auvec ches portraits qué lé Connêtabl’ye Lé Bréton finit et r’chut d’s appliaudiss’ements bein méthités pour ses bieaux portraits.

Mde. Le Sueur en montrit deux-s-trais qu’oulle avait prîns à la fête lé mais d’août.

Lé souper, du thée et galettes, fut sèrvi par lé Conmité Exétchutif, et lé Président fit les r’mèrciement preunmiéthement au Connêtabl’ye Lé Bréton pour aver donné eune si bouanne séthée et au conmité pour lé souper.

Les annonces

Les annonces suivîtent. La préchaine rêunion mensuelle es’sa un jeu d’cartes dans la Salle Pârouaîssiale dé St. Pierre, vendrédi, l’29 d’mars. Vendrédi, l’26 d’avri, la rêunion mensuelle étha lieu à “Highlands College”, auvec d’la musique par les êfants.

Moussieu P. J. Romeril èrmèrcyit lé Connêtabl’ye W. J. Tomes pour l’usage d’la salle.

1974