Fitchi à la têtchiéthe et au paîsson,
j’avais peu là où’est qu’j’tais pouor bein longtemps;
mais i’ n’est pon d’mêtchi d’rester d’abouon
pus qu’nou-s’en gângne en amour et argent.

J’dêcache les clious et d’samathe touos les noeuds,
j’en hale les couèrcl’yes et j’dêpaque mes patchets,
j’dêteurque mes mémouaithes, en dêtoupe les creux
et j’abanonne mes avis et pensées.

J’ai dêcouôsu ma tapiss’sie d’êcants,
j’ai halé mes habits dêboutonnés,
j’ai laîssi couôrre mes întentions au d’sans
auve touos mes plians et pliaîsièrs dêcliévés.

Et don quand veindra l’heuthe pouor dithe à bi,
nou n’est pon lâche, s’nou-s’est pouor dêlachi.