Né v’chîn l’texte d’aniet d’not’ auteu du mais, Augustus Asplet Le Gros:

Here’s today’s text by our author of the month, Augustus Asplet Le Gros:

Nou-s-a soin d’nos avertir
Que nou va, ma fé, bâtir,
Vivons en espérance!
La cauchie qui pouorra t’nin
Chein qui n’voudra pon y v’nin:
Ch’est là la différence!

I faut payi pour êtr’ biaux,
Ne savious pon ch’là, pouor’s gniots;
Vivons en espérance!
Dans leux paoute ils ont des sous,
Et pourtant n’ont rein du tout:
Ch’est là la différence!

Mess Ch’t-y-chin et Mess Ch’t-y-là
N’y véent pon un bein grand ma;
Vivons en espérance!
J’y verrons berque et steam-boat,
N’y-a pon d’soin, couôte qui couôte:
Ch’est là la différence!

Faut-i devrai aveir peux
S’nou-s-a la bourse d’un gueux?
Vivons en espérance!
Un quoeur de noble qui n’a rein
A la foué qu’il a du bein:
Ch’est là la différence!

Envions à tort, à travers;
Touonnons la bourse à l’envèrs:
Vivons en espérance!
Nos èfants paieront l’éco,
Et s’êcrieront sus not’ co:
Ch’est là la différence!

Le Great-Eastern y veindra
Nos r’tirer de l’hopità;
Vivons en espérance!
Jèrry, Jèrry, n’est pon mort!
I s’en va aveir un port:
Ch’est là la différence!

J’joindrons l’chein de Guernésy
Auv’ le p’tit port de Jèrry;
Vivons en espérance!
Il y-e’ra assèz de run
Pour un navire, au meins iun:
Ch’est là la différence!

N’y-a pon d’soin de ioù les sous,
Bâtissons des ports partout;
Vivons en espérance!
A Bouon’n-nièt, et au Bouoley:
Maitre Jean y veit si cllé:
Ch’est là la différence!

J’oubliais la Grèv’-de-Lecq,
Pis i faut grandir Rozé;
Vivons en espérance!
Et pis le p’tit Portelèt
Qui pouorra battre Gourrèy:
Ch’est là la différence!

Ah! messieurs les Députés,
Dèpensèz à tout jamais;
Vivons en espérance!
La bourse du Juif-èrrant
Avait tréjous des sous d’dans:
Ch’est là la différence!