Lonôre Pain fut hufée en 1917:

Eleanor Pain was slighted in 1917:

Y’a prospé qu’pepée s’en va avé eunne djob de tchiq’ sorte souous la nouvelle Loué Militaithe. Car, j’avons ‘té oblyijis – par réspé d’nous mêmes – de plianté d’en-par-où Laïesse Ernon et sa pliant’tie d’patates. Coumme disait mémée, la séthée que j’sécoûmes la poussiéthe de nos pids contre chutte maison là: “A monié du puté, ma Lonore, nou risque de s’enteuthé.” Ch’est-tan’tchi, mémée et mé, j’dîmes à pépée. – Après avé lus chutte lettre d’insulte qui pathu sus la gazette – que pour rin au monde je n’réstéthaîmes eunne autre minute en contacte avec des gens qui mantchaient d’même de réspé à des gens de tchi qu’Laïésse Ernon, tout propriétaithe qu’il est, n’est pas digne de dêslachi les souliers.

Et pis, n’allez pas créthe la maintchi de ch’qu’en dit chu Caouain: “la vérité n’est point en lui” coumme dit mémée. Et ch’t’affront de m’traité de “halfrague!” J’en plieuthi d’rage! et mémée dit qu’sinon qu’nou savait bin qu’i n’y’avait rin à plieumé sus sa triste carcasse, nou y’éthait bel et bin envié Bille pour avé êsprouvè à èscliaitchi ma réputation d’jeunne fille à mathié: ch’est si caylin! et i’ faut si p’tite chose pour en térni la fraicheu!

“V’la ch’qu’en advint, dit mémée, de s’touôslyi avec des gens du peuplye! des gens qui n’ont pon d’manners’, des tombieaux blianchis pliens d’frouets et de toute sorte de corruption! v’la ch’que j’avons gagnyi pour avé voulu “faithe not’ bit” parmi des gens qui n’vont ni à prêche ni à messe!”

N’y’a qu’pépée qui semlye un mio d’s’appointé. “Lus cidre mé conv’nait, qui dit, et chès gens-là c’menchaient justement à savé ladgi lus tchéthue! Coumment qu’i’ s’en vont s’dèshallé et mé pas là? Ché s’s’a chose tchuthieuse d’allé vaie l’vé lus récolte, ha! ha!”

“Et pis, y’avait d’bouons sous à gagni – sans compter les dons – très sweediches qu’nou rapportait l’sé souos san d’vanté.”

Enfin! J’en soummes cliérs, de chutte djingue; et i’ s’en va fallé vaie à trouvé tchique autre djob. Pépée, coumme j’vos l’dit porte chance d’en avé yeunne sous l’Gouvernement (tchiq chose entouôre les canons) et y’a moniéthement patholle passée (cheun’chin tout à fait entre nous) qu’nou pouorrait bin avé besoin d’mes services sus l’Tribuna’ des Exemptions! Quand les Juges s’s’aient à je-n’sai sus un soudard, ch’s’s’ait mé qu’éthaient à dithe le dernié mot pour l’envié au Front ou l’gardé à labouothé la terre. Si j’ai la djob – coumme probablye – attendu que l’Caouain ou Laïésse Ernon vennent à tâchi d’en rêscappé! J’dithai: Good for the Front! que les Juges en tressaut’tont.

Lonore Pain
La Nouvelle Chronique de Jersey 17/3/1917