En 1916 la Gâzette du Sé baillit l’sa à Piteur Pain.

In 1916 the Evening Post sacked Piteur Pain:

Ch’est bel et bon d’félicité Mess Mauji d’avé ‘té appointé dernièthement à la djob de Collecteu d’Rât d’Police; mais tchès qu’en est d’mé? Mé qui sis à cherchi eunne djob par monts et par vaux dépis que l’ “Post” nos a dounné l’sac: mé qu’ai femme et èsfant et un n’veu au frunt à tchi qu’i’ faut envié des cauches et du p’tun toutes les s’maines; tch’est qu’en est d’nous? qui soummes à rin n’faithe dépis des s’maines, et qu’avons l’pus bé d’nos sous pliéchis dans un navithe qu’a ‘té coulé par le Moëwe? Et justement coumme je n’faisais seux – y’a pathenté entre les Pains et y’un des membres du Coumité – d’eunne bouonne pétite plièche souôs l’Gouvernement, tchiq’ pendloque est v’nu nos foui souôs l’pi, et nos v’la pour bin dithe sus l’pavé, péthe, mèthe, et not’ chièthe Lonore.

“N’y’a qu’eunne chose à faithe, man pouôre Piteur, que m’dit Laïzé l’aut’ matin, tandi qu’oul ‘tait à rôti not’ dernié matin, tandi qu’oul ‘tait à rôti not’ dernié rouoge héthan au d’sus d’eunne chandelle qu’j’avais emprunté; i’ faudra s’mettre à travallyi la terre. Né v’la la pliant’tie qu’appréche, et, j’ai ouï dithe qu’les fermiers manquent de bras, et – qu’ou dit en r’troussant sa manche – faut lus offri cheun’chin!”

Hélas! Ch’n’est rin d’digant, qu’les bras à ma femme! Ch’est maigre coumme des cannibottes! et ses mains ont souvent l’trembliot, et oul est souvent prînse d’èstourtisaison quand ou s’baisse. Mais s’n’idée n’est pas tant mauvaise! Nou pouôrait faithe piéthe que d’nos engagi pour la pliant’tie, hé! Si la méthe est pus-à-co avrônée, la fille, en r’vanche, est forte coumme un capestre! S’ou la viyaites se rêmouer! Forte? Y’a l’jeunne maître d’èscolle qui vint tchiq’ fais passé les séthees avec nous: Hé bin! tchiq’ fais, pour se rèscauffé les sangs (l’tcherbon est si chi!) i’ s’mettent, Lonôre et li, a joué à des jeux d’compognyie. I s’assiévent à pliat sus l’aithe, l’un endret l’autre, les pids contre les pids; I s’en tchiennent les poignets bin du, et – halle tant qu’tu pouorras! Ch’est tréjous Lonôre qui gagne, et l’maître-d’èscolle qui s’en va r’bindé contre la pathé!

Mais tout cheunna n’remplyit pas l’estouma, malheutheus’ment; et – en attendant que l’Gouvernment m’dounne eunne djob bin payie – j’en soumes réduits à cherchi du travas siez tchiq’ fermi, pas trop loin d’la ville. Lonôre pour plianté, Laïzé pour copé d’la s’menche – viyant qu’ou craule sus ses érgots – et mé? J’n’ai pas ocquo décidé tchi travas m’convaindrait l’mus. Mais l’docteu est d’avis qu’sus toutes choses i’ n’faut pas m’baissi – à caude de man tcheu, ni couôrre – rapport à mes rignons, ni joué des bras – rapport à mes poumons, ni sué – viyant qu’man fée est touôné rouetre.

Mais j’soumes touôs les très bin ouillinne! et s’nou peut s’accordé sus les gages et la neurtuthe – coumme tchi dithait eunne bollée d’soupe en arrivant, lunch à onze heuthes, un bouan dîné, du tée et d’la galette à très heuthes, et tout plien d’cidre, j’soummes près (à condition qu’i’ n’y’étha pas d’juth’thie dans l’clios, dit Laïzé) à baillyi un coup d’main à tchiq’ fermi d’bouonne éspèce.

Piteur Pain
La Nouvelle Chronique de Jersey 17/2/1917