En 1934, lé Cahouain n’tait pon un féminniste, li!

The Owl was far from being a feminist in 1934:

Si jamais le Chef m’a fait pliaisi, ch’tait l’aut’e jour quand i’ m’dit, “Caouain, tu t’en vas à l’Exposition à Springfield pour vaie ches siex belles filles-là que Mess Cabot et Mess Britton ont ‘té chouaisi en Angliéterre et qui sont pour être exhibées dans l’Pavilion. Tu t’en vas les examiner minutieusement et les classifier dans lus ordre de mérite et il est tout-à-fait possiblye que tu gagn’nas un prix si ch’est que tan jugement correspond avec le verdict du public.

Ou pouvez craithe que je n’me fit pas prier deux feis, car je prétends m’y connaître dans ches choses-là; c’est ma spécialité toute partitchuliéthe. J’en ai fait une êtude toute spéciale. J’ai passé d’s heuthes, le nez collé ès vitrines des grandes boutiques dans la ville à contemplier les belles fidguthes en chithe qu’y sont exposées.

Mais ch’tte affaithe ichin s’en allait être bain pus interêssante.

Les siennes de Springfield etaient vivantes, sapresti!

Je suggéri au Chef de m’baîlli un chelin ou deux pour le prix d’entrée, menus debours, etcétera, mais comme d’habitude i’ me r’fusi en m’disant que les membres de la Presse entraient partout franco.

En arrivant à Springfield je n’me dêrangi pas d’aller vaie les g’niches à Mess Perrédès ni les vaques au Cap’taine Bolitho, nou peut vaie chenna touos les jours. Je ramonti tout dret pour vaie les jolies drinettes.

L’individu qu’était assis à la porte à collecter les sous me prins pour un êtrangi et tendi la main pour ma contribution.

“Press!” je m’êcriyi, et malgré touos ses protêts j’entri dans la salle.

Tchi spectaclye, mes bouannes gens!

Siex superbes fillettes châtchune dans san p’tit alcôve, belles comme le jour et vêtues de costumes ravissants.

Mais m’n arrivée fut la cause d’un incident alarmant.

La premiéthe, dès qu’ou m’avisi, fit un brès qui fit trésailli tout l’monde, et ou se r’tithi jusque dans l’fond d’s cabine.

Toutes les autres en fîthent autant chein qui fît l’moussieu qu’était en cherge, s’en v’nin tout-d’suite vaie de tch’est qu’i’ s’agissait.

“Tch’est qu’i’ y a don Mesdemouaiselles?” qu’i’ s’fît.

“Oh!” iune li raîponni, “ch’est chute caricatuthe-là qui vaint d’entrer! J’en avons si grand peux!”

L’autre qui m’connaît tout-à-fait bain, lus fit, “I’ n’y a pas d’dangi, Mesdemouaiselles, ch’est raique le Caouain des Chroniques; malgré s’n appathence farouche, i’ n’est pas du tout mêchant, et i’ n’vos f’tha pas d’ma.”

Chenna les rasseuthi un mio mais i’ me r’gardaient avec mêfiance quand j’appréchais d’ieux et tout chenna m’chotchi, mé, et naturellement je n’les trouvais pas aussi belles comme tout chenna opprès une patheille réception.

I’y en avait iune tout-d’même qui prouvi pus avenante que l’s autres et qui m’souôrit, en m’faîsant les doux yeux.

J’en fus tout-à-fait êprins d’chette-là et je n’hésiti pas de la mertchi premiéthe en effet d’biauté, sus man carton.

Ch’tait la jolie blonde qu’était à drouaite dans la carre de haut.

Quand l’rêsultat d’la compétition fut publié, je réalisi, à ma grande surprinse qu’oulle avait ‘té raique pliaichi quatrième par la majorité du public.

Chein qui prouve que l’public est un imbécile.

A ma rentrée au bureau le Chef me d’mandi de li faithe un rapport de mes impressions. Je li raconti don tout ch’qui s’était passé, et qui n’y avait pas le moindre doute que ch’tait des belles hardelles et avaient prouvé une grande attraction pour le public et un grand succès pour la Sociêté d’Agritchultuthe du point d’veue des recettes.

Mais, en même temps, j’étais arrivé à la conclusion que si à l’avenin la Sociêté veurt organiser une compétition du même genre i’ ne s’sait pas nécessaithe d’envier Messieux Britton et Cabot en Angliéterre ramasser des êchantillons.

Dans touos les cas, si ch’est qu’ils y r’vont je voudrais bain y aller avec ieux, mé.

Mais i’ n’est pas besoin de tout chenna. J’avons tout aussi bouan en Jerri!

Au moment que j’étais à Springfield i’ y avait des jeunes filles parmi les spectateurs qu’étaient aussi belles commes ches Angliaiches-là.

Je voudrais suggérer au comité d’organiser un patheil concours l’année tchi vaint pour des Jerriaises seulement, et pour supporter l’entreprinse je lus garantis d’inscrithe Marie Hibou, sapresti!

Je sais bai qu’ou n’est pas tout jeune acheteu et que l’age et la minsèthe l’ont détériorée un mio, mais je sis persuadé qu’en li râsant les paupiéthes et li en mertchi d’autres avec un crayon et en li saupoudrant la fache avec les couleurs nécessaithes, i’ s’sait possiblye de la mettre pus ou mains présentablye et je n’voudrais pas garanti qu’ou n’gagn’nait pas un prix.

Pour en fini, v’là ma suggestion. Le Comité peut la prendre ou la laissi comme bouan li semblye.

Caouain
Les Chroniques de Jersey 1/9/1934