Né v’chîn l’texte d’aniet d’not’ auteu du mais, Jean Picot (J.P.):

Here’s today’s text by our author of the month, Jean Picot (J.P.):

Sus la Grande Chaise au Cardinal lé Corbin s’tait jutchi!
Quoiqu’ Evêques, Abbés, et Prieurs ‘taient là endrait l’i,
Ov unn’ guingue dé prêtres, dé jannes et d’viers,
Des hoummes dé guerre ov lus èstchuyiers,
Et un tas d’autres gens pas si haût plièchis,
Tout bein comptè, unn’ fâmeuse conpagnie?
Enfin, riches ou paûvres, tous qu’étaient là
Faîsaient la révérence au célèbre Prélat:
Car si jâmais ètre humain
Etait orghillieux ou haûtain
Voire, même pus qué Gouverneux, qué Rouai ou Prince,
Ch’tait sén’Eminence lé Cardinal Archévêque dé Reims!

Coumme s’i y’iavait fait sa vie, et sans sé gêner unn’ mie,
Lé Corbin s’proumm’nait partout, parmi grands et p’tits,
I saûticottait sus les tab’yes, et dans pliats ou assiettes
I s’amusait à y beccotter chein qu’il en voulait dé miettes,
Et dans un temps nou l’vit, par pure malice,
Danser sus les biaux emblièmes d’office!
Mais pas content dé chonnna, v’l’à t’i pon qué l’ouaîsai
Va sé jutcthi sus la chaise ouèqu’ lé Cardinal était,
Voire, même sus lé bord dé san grand rouôge Chapé!
Et i sembliait l’i dire ov un clyin d’yi d’affrontè:
“Ch’est pour nos deux, est-che pon, l’fète d’annièt?” –
Et prétres et moinnes, ov peine et chagrin,
Dé vais les farces du tracas d’Corbin,
S’entr’disaient en trembliant, et pales coumme des morts:
– “Chet’ ouaisai-là, pour seûre, a l’Djiâlble dans l’corps!” –

Unn’ fais que chès bouann’ gens là eûrent bu et mangi,
Chein qui restait du festin fut bein vite clièrgi,
Et sièz p’tits garçons, des èsfants dé l’Escolle,
Ov lus faches bein propres, et en blianches qu’minsolles
Entrirent deux à deux sans dire unn’ parole –
Lé prumi mousse portait unn’ belle canne dorée
Plienne d’jiaûe – la pus finne dé toute la contrèe –
Lé deuxième t’nait un baisinne tout dorè coumme la canne,
Et pis deux des pus grands, s’en v’naient étout portant
Des bouteilles pliennes d’jiaûe d’Lavande, et d’jiaûe dé Cologne,
Et pour qué les mains à sén’Eminence fussent parfait’ment nettes
Les deux derniers portaient, yieun lé savon, l’aûtre sa serviette.
Monseigneur était fi, d’vais alentou d’li
Dé biaux èsfants, habillyis en blianc

Et qu’apprêtaient tout, sans faire unn’ mie d’brit;
L’i, les manches ertroussées, vit l’i même l’iaûe parfumèe,
Mais sa Seigneurie pourtant, dévant couler ses mains d’dans
Halle dé d’sus san dait sa grosse bague à djiamants;
Sus la tabl’ye i la mét, coumme i crait en seûretè,
Sans se douter qué l’ouaîsai malin l’avait guettè;
Et quand’ y qué lé garçons, les grands et les p’tits,
Y’iaidjiaient entouôre toute sa ouâtchin’nie,
Lé Corbin saute sus lé Bijou, et ov un coup d’bec,
Sans être veu dé persounne, i fiche le camp avec!

Un quart d’heure ôprès chounna, y’ieût un djiantre d’sabbat
Et les gens sé d’mandaient: – ” Sécours, tch’est qu’i y’i’a?” –
Mais nou viyiait prètres et moinnes, et jusqu’ès avers
Ov lus pouchettes toutes touônèes à l’envers –
D’aûtres s’étaient mins, sus l’plianchais à grappins,
A fouoillyi ov lus mains, dans touôs les raccoins;
Sen Eminence gênè avait l’i même hallè
Ses deux slippeurs brodès, et dépis l’talon à l’ortè
I vos les sécouait coumme un vrai possédè!
Montrant, en sé r’troussant et en sé r’touônant,
Tchiq’fais à droite et tchiq’ fais à gaûche,
Souôs sa robe ses finnes rouôges caûches!
Tous eûrent biau cherchi souôs tapis et telles,
Touôner dé bord les pliats, la vaisselle,
Dèsrâclyi les chendres dans l’âtre, pas d’signe ou nouvelle
I n’purent trouver du bijou perdu,
Ni d’vinner ouèqu’la bague avait disparu!

Lé Grand Cardinal sé l’vit, et d’un ‘air sévère,
Print sa clioche, san cierge, et san bréviaire,
Et dé sa vouais dé réligieux, et tchi faisait peux,
l s’mint à maûdire lé fichu voleux!…
I maûidit san vilain corps dé la tête ès pids,
I l’maûdit débat, lé maùdit assis,
Lé maûdit en dormant, pour que tréjous i rèsvrait
Qué lé Djiàble bein du dans ses griffes lé t’nait,
Lé maûdit en mangeant, lé maudit en bévant,
Maûdit en saûtant, en dansant, en couôrunt,
Lé maùdit en vie, lé maûdit en mouôrant!…
Ch’tait unn’ malédiction à en faire tremblier les gens.
Mais unn’ fais finie, chein qu’aggravait l’affaire,
Ch’tait qué persounne quétait là n’en paraissait d’pière!

I n’y’eut pas, tout coumme, du tout dé r’pos
Pour moinnes, l’prêtres ou dévots,
Car i fallut cherchi pour la bague toute la bénite nièt,
Sans aver la chance dé s’couler au lièt…
Enfin lé Sacristain vit, à la pointe du jour,
S’en v’nant drait à l’i, ov ses plieummes à l’arbours,
Lé fichu Corbin.. il tait maîgre et faillyi,
Ch’tait avec peine qu’i pouvait l’ver l’pid,
l n’sauticottait pas, ses ailes pendaient en bas.
La tête toute nue – sa biaûté perdue –
Les yieux embliâzés – i n’viyait presque pus!
Tous s’minrent â criyier, en r’gardant l’ouaïsai
“Lé v’là, lé v’là! ch’est là l’scélérat,
“Qu’a volé la bague à not’ Grand Prélat!”

Lé Corbin à mié-mort, fit un tout pétit “Cor”.
Et i touônait d’un bord sa tête, d’unn’ tristre manière,
Coumme pour lus dire: “Messieux, vos pliaît-mé sière?”
Et prenant lè pas l’avant, cliopinant, tchulbutant,
Faisant grimper prêtraille et toués ses suivants
Jusqu’à la porte du pus haût cliochi;
Et là, driére l’hus, i lus montri san niche,
Ouèqu’ la bague du Cardinal était bein muchie.
Parmi dé l’éstrain, mios d’bouais, et un tas d’salop’rie!

Unn’fais la bague ertrouvèe, lé Cardinal eut l’idèe
Qué l’voleux de Corbin avait souffert assez,
Il ôti don dé d’sus san co’ sa malédiction,
En l’i dounnant, endrait tous, plienne Absolution,
Au son dè sa douôche vouaix, ché fut tchurieux dé vais
Coumm’est qui sus l’Corbin dé neuves plieummes craissaient!
Et i vint, tout d’un coup, si gros et si gras,
Qué, pour en dire lé vrai, nou n’lé r’counnaissait pas,
Mai chein fut un ouaîsai changi – tant à fait converti,
l n’fit jamais pus méchèt on maûvaistchi:

Mais bein au contraire
A messe ou prière
Sair ou matin, lé pieux Corbin
Etait seûre dé s’y trouver tréjous l’prumi!
Et là i soignnit qué tous fissent lus d’vé:
Car, voul’ons bein l’craire, si tchiq’ révérend frère
Au sermon s’endormait, et c’menchait à ronflier.
Bein vite ov un coup d’bec, i vos lé resvillyiait!
Lé Corbin vêtchut d’même en saintétè, tout l’restant dé sa vie,
Et quand i fut mort, Evéques, Prétres, et Moinnes furent d’avis
Qu’i n’fallait pas jamais l’oubliyier l’i, lé dévot des dévots,
Et don il en firent un Saint… ov lè nom dè Jim Crow!…