Né v’chîn l’texte d’aniet d’not’ auteu du mais, Jean Picot (J.P.):

Here’s today’s text by our author of the month, Jean Picot (J.P.):

Ch’tait dans l’temps d’la vielle Milice,
Dans le Régiment deux, compagnie trais),
Qu’à forche d’aller à l’exercice,
Not’ oncle Tom avait uzai ses braies;
Y les faisait mainglé, tréjous bianches,
Stiff et raide coumme unne pianche,
Rouoge câsaque, cartouchi et sleingues,
Shako, arme et les autres bastreingues:
J’vos dit que ch’tait d’la proprétai,
Jamais de not’ vie n’avais veu ditai!

Not oncle avait un divers ordghi,
D’avé tout san fait net et bein blianchi;
Mais ses vieilles braies,
S’en esprit gênaient.
Y n’y avait pus qu’un jour devant la R’veue!
Et s’en allé là, “ov des braies en creux!”
L’Oncle se dit: “Enfin, tant bein, tant mal,
J’en réthai une pathe à l’Arsenal,”
Et y s’n’en fut porté ses chitchettes,
Quand le Coronel veint là sus l’s’entrefaites,
Et y dit au gardien d’y bein soigni,
De y’en dounné qui n’avaient pon servi.

Not’ Oncle s’en r’vint de là, mais tout fi,
Ov des braies qu’étaient trop longues pour li!
Ah bah! se fit y,
Les femmes dé siez nous,
Bein vite s’en vont,
Pour me faithe pliaisi,
Mé les raccourchi:
Venu à la maison,
D’jai comme peinchon;
V’la notre Oncle Tom
Tchi dit à sa femme:
Ma femme, je voudrais
Qué tu m’raccourcherais,
De six à sept pouces, mes neuves brais.
La femme n’était pon de buonn’ humeur,
Hou répondit à Tom, et pas d’buon tchoeur:
“Tu m’embêtes, tu veurs té fichi de mé;
J’ai t’y pon tes cauches à rempliété?”

Not’ Oncle s’en r’fi.it et dit en passant,
Ma belle soeu, ne m’en ditha pas autant;
Et y l’y demandi de faithe la djobbe,
Mais la vieille fille, n’fut pas pus aimable,
Et dit, “biau-fréthe, ch’est un affront que tu m’fais
A mé qui sis fille, v’nin paslé de tes braies!”

Not’ Oncle s’en r’fùt, il tait tout attristai,
Pendan l’zoeuthelles coumme un tchan fouotai:
Mais y pensi… yia oquo Suzon, not’ grande,
Pour l’y, ou n’erfusera pas ma demande,
Car ché n’est pon, ma fingre, autant,
Comme dé faithe des slippeurs à san galant.
Suzon était oqupaie ajouai au piano,
Et n’fit pon la minne d’en entendre un mot,
Car tant pus haut, que l’buonhomme criait,
Tant pus haut, la hardelle jouait!
Si fit not’ Oncle, car il avait t’choeu tout gros,
“Ch’est fichu de mes braies;” et y s’en hit au clios.
Hélas! se disait-y,
“Si j’étais coûotuthi,
Je les éthais mé-même raccourchi.”

Mais un’ fais que not’ Oncle fut hors,
Sa femme lut prinze d’un mio dé r’mords,
Et se dit-alle: “Ch’est vrai, j’ai yieu grand tort,
De r’frsé Tom, et vite je m’en vais
L’y raccourchi ses tracas d’braies!
A route don! ciseaux, adjulle et fi,
Et tout l’travas, fut bein vite fini;
Sies pouces d’une gambe, de l’autre sept,
Ou à peu près, et lé djob ‘tait faite,
Hou r’griyi chonna à sa mannièthe,
Et erpendit les braies dans l’armoithe.

Mais êcoutais mé un mio, j’vos en prie,
Comme les femmes changent vit’ d’avis:
D’emiheuthe auprès, l’aithêtes ‘ous creu,
Ne v’la t’y pon aitout que la belle-soeu,
Monte à haut, et taule,
Coppe et pis travaille,
Sus les braies à Tom sans r’gardé un’ mie:
Sept pouces d’un gambe, de l’autre six,
Et erpend tout d’méme dans l’armoithe
Et devale à bas, et toute fièthe, criant d’avé ‘tai buonne à san biau-fréthe.

Suzon y r’veint, et pensant faithe de san mus,
En coppi ès braies autant ou p’têtre pus,
Et erserre tout, criant bein qué san pèthe
L’y serait buonn gai, pour chein qu’on v’nait d’y faithe.

Ah, ichin m’en histoithe s’arrête!
Car j’en crétheais pon vos faithe fête,
En vos disant chein qué not’ Oncle Tom,
Conti et rouâbli à ses traies femmes;
Car il en dit: chétai d’hôriblles d’vis,
A pienne bouoche, ch’tait une êcrase,
Quand y vit, ses belles neuves braies changies
En drâzes!

J’tais là, et pour le mettre de bouonne humeur,
Je l’y dit, m’n Oncle, ch’est des nickeur-buckeur,
Tu n’as qu’à mettre, pour la r’veue dé d’main,
Des bianches cauches et pis tout s’ra bein.