Aniet ch’est l’annivèrsaithe d’la Batâle dé Jèrri (lé six d’Janvyi 1781):

Today’s the anniversary of the Battle of Jersey (6th January 1781):

Jèrriais, souv’n’-ous du six d’Janvyi,
Dé chu jour mêmothabl’ye,
Tchi fut têmouain dans not’ Jèrri
D’eune action admithabl’ye.

Jèrriais, souv’n’-ous dé chu jour-là,
Jour d’honneur et dé glouaithe;
Jèrriais, souv’n’-ous dé chu jour-là,
Gardez-en la mémouaithe.

Les anciens n’fûdrent pas couoyons,
I’ s’mouontrîdrent des hommes;
Mouontrons qué lus p’tits fis sont bouons,
Qué lus d’cendants jé sommes.

Jèrriais, souv’n’-ous dé chu jour-là,
Jour d’honneur et dé glouaithe;
Jèrriais, souv’n’-ous dé chu jour-là,
Gardez-en la mémouaithe.

Séyons tréjous à not’ déver
Et à l’amour fidèles,
Sus nous pouôrront tréjous compter.
L’vièr Jèrri et ses belles.

Jèrriais, souv’n’-ous dé chu jour-là,
Jour d’honneur et dé glouaithe;
Jèrriais, souv’n’-ous dé chu jour-là,
Gardez-en la mémouaithe.

Séyons tréjous Jèrriais dé tchoeu,
Aimons touos not’ patrie,
Qué dé notre île lé bonheu
Sait lé but dé not’ vie.

Jèrriais, souv’n’-ous dé chu jour-là,
Jour d’honneur et dé glouaithe;
Jèrriais, souv’n’-ous dé chu jour-là,
Gardez-en la mémouaithe.

À la mémouaithe dé Peirson
Rendons honneu et louange,
Qué la r’connaissance à san nom
Parmi nous janmais n’change.

Jèrriais, souv’n’-ous dé chu jour-là,
Jour d’honneur et dé glouaithe;
Jèrriais, souv’n’-ous dé chu jour-là,
Gardez-en la mémouaithe.