Les Chroniques de Jersey 13/11/1926:

J’avons en Jerri un tas de gens pourtchi notre vièrr patois est un galimatias qui n’mérite pon autchune considération. Ces gens là sont tellement savant qui ne savent pon comprendre notre vieille langue et n’v’la pourtchi qui n’veulent pon en ouir pasler.

Ch’est d’antchi que j’sis bein aise de vais que touos n’sont pon de chut avis, car il n’y avait qu’à aller l’autre sé à l’Eisteddfod pouor vais couomment que des centains de gens lus amusites à ouir des sornettes en vièrr patois. N’v’la la meilleur réponse ès siens qui sont jerriais car y faut pon oublier qu’il fut un temps ou certains n’voulaient pon avèr de jerriais en touot à chutt Eisteddfod et qui sont bein aise acheteu de ramassi les copeurs que ces concours rapportent.

Dans la paraisse au Buan Bergi, il y eut l’autre Vendredi au sé un meeting des pus grands d’la paraisse iou que chunna cauffi raide.

Ch’tait à l’entouor des chantgnis dont la bail est finie. Nous décidi de lus faithe l’compliment et d’lus d’mander de rester en office encouore pouor trais ans, mais deux ou trais des siens pésent n’taient pon touot à fait de chut avis et ch’est qu’il y en eut du d’vis à l’entouor de chein qui s’passi il y a trais ans.

Quant vint un temps, l’boss prins son chapé et s’n’alli sièz ly. Un p’tit pus tard Winter en fit d’même mais il tait passé minnièth quand les autres lus décidèrent à rentrer sièz ieux pouor se couchi.

D’pis il ya ieut hardi de devis et j’pouorrais vos en raconter de pus d’une sorte, car il y en a qui sont hardis marris viyant qu’il s’est trouvé une “fosse” pouor enterrer lus projets!!

J’sais bein qu’il y a ieut d’la marcherie touos ces jours et que nous a été visiter chutte fosse, mais j’crais quassiment que n’v’la qui ne changera rein en tout.

Couomme nous dite: “Qui vivra, verra,” mais quant à mé, je n’crais pon que l’autre boltera.

L’autre Samedi au sé, Bésansaif, couomme d’amor r’venait d’la ville quand y fut prins mal couomme qui dirait du mal de mer, la tête ly touornait et quand vint un temps les gambes s’minrent en strike laissant l’buanhomme affalé dans le beau mitan d’la route.

D’pis combin d’temps qu’il tait là chunna je n’peux pon vous l’dithe ni ly éttout, toujours est-y qui faut craithe qu’il s’y trouvait bein, car quand un buan samaritain parvint à le réveilli oprès l’avêr chaqui un mio fort, notre amin Bésansaif d’vint mârri et rouoge de colèthe y s’fit qu’il payait son rât des qu’mins couomme touos.

L’pus bé de l’affaithe ch’est qu’nous eut beau ly dithe qu’un p’tit d’pus il aurait été écrasé par un motor si l’on s’n’était pon porté à son secours, Bésansaif insulta nos gens lus disant de s’otchuper de lus affaithe et de le laissi trantchille. il fallut l’emmener de force hors de la vaie.

J’gage qu’au lieu de signer loa tempérance chut oisé fêti à sa manièthe et en levant le coude le fait de l’aver écappé de si près d’être écrabouillé quand nous ly dit le lendemain chein qui s’était passé la séthée de d’vant.

Caouain
Les Chroniques de Jersey 13/11/1926