Nou-s-a tréjous ouï dithe qué y’a bein longtemps, un cèrtain Geffray, tch’avait ‘té trouvé coupabl’ye d’un crînme contre eune femme, fut condamné à être fliantchi avaû eune droque à la mé. Et, souo-disant, la pliaiche tchi fut chouaîsie ‘tait eune tête dé falaise entre Anne Port et Lé P’tit Portélet, pas liain d’Gouôrray. Sans doute les gens y’affliotchîdrent d’partout pouor vaie chutte peunnition, les femmes sustout y’étant en grand nombre. Lé prisonnyî fut don emm’né là par deux hallebardgièrs et, au moment donné, flîantchi à l’ieau par lé pendard dé chu temps-là. Par un grand coup d’chance lé malfaîteux tchit à l’ieau sans malheu et, pouvant nouer comme un paîsson, ratèrrit dans rein d’temps. V’là tchi fit hardi d’excitement parmi la foule, et l’s uns ‘taient pouor l’extchuser et l’laîssi couôrre, car i’ l’méthitait bein d’pis tch’il avait ieu eune telle mèrveilleuse êcappe, d’autres étant d’idée tch’il avait ‘té condamné à mort et, don, tch’i’ fallait l’faithe èrdrotchi eune aut’ fais pouor subithe les conséquenches. Mais li, Geffray, dé san chef et comme coup d’vaillantise, offrit d’répéter chu grand saut à l’ieau. Véthe, mais…! Chutte fais-‘chîn, dgia, i’ s’capuchit la cabiche sus un rotchi à l’ieau, ou souos l’ieau, et fut tué.

Tréjous d’pis ches temps-là nou-s-a appelé chutte tête dé falaise Lé Saut Geffray, ou, comme i’ disent à St. Martîn, Lé Saout Geffray.