J’avons bliodgi un but dé ch’t’ articl’ye d’vant, mais n’en v’chîn l’texte entchi:

We’ve blogged an extract from this article before but here’s the whole text:

Le Caouain félicite la pârraisse de Grouville sus san chouaix!

Et i’ félicite Herbert ettou sus les fait que les Grouvillais li ont fait l’honneur de li d’mander d’être lus Connaîtablye. (J’espéthe qu’i’ m’pardon’na pour l’appele d’même par san nom, mais j’ai tréjous ieu l’habitude pus ou mains pernicieuse de tutoyer les gens, et che s’sait me faithe une injustice de m’acchuser d’un manque de respect).

Si j’fus à Grouville? Mais, sans doute que j’y étais.

Ous avez tous lu, dans les difféthentes gazettes, un résumé de touos les biaux discours qui futrent prononcés, alors je n’m’en vais pas vos ennier par les répéter ichin.

Mais ou vos attendrez que j’diche deux mots sus la p’tite surprinse que Herbert nouos rêservi pour la fin.

Je dis une surprinse, car, quand nous a respecté, de temps immémorial, une ancienne couôtume si bain-aimée de la pus grande partie des êlecteurs Jerriais, ch’est-à-dithe la couôtume que tout nouviau-êlu dait fourni des rafraîchissement à tout l’assistance, afin qu’i’ piaissent baithe à sa santé, ch’est une surprinse, est-che pas, quand nous a la gorge sèque à forche de crier “Hear hear!” et qu’nous aspithe le moment que la cérémonie officielle es’sait finie pour aver san p’tit lermin comme d’habitude, que nou vos diche tout cru, “Messieux, à cause de la djerre, i’ n’y étha pas de rafraîchissement à saîssé, les sous que nous aithai mins à vos abreuver essont donnés à la pliaiche, au “Working Party” à Madame Touzé.”

Quand j’ouï ch’la mé, malgré que j’avais la gorge une chimenée d’briquethie, je n’pus pas m’empêchi de dithe à mé-même, “Bravo Herbert! Tu’as raison, man garçon!”

Et je m’joigni à Ernie, d’la Trinn’té en félicitant le nouviau Counaîtablye d’aver ieu l’couothage de prendre en considéthation les circonstances souos tchi que j’vivons à l’heuthe actuelle et d’êcarter une couôtume qu’est liain d’être condamnablye du point d’veue d’la sociabilité, mais de tchi qu’nou peut s’passer bain facilement, sustout quand nou réalise que les frais qu’aithaient ‘té encouothus es’sont applitchis à la fournituthe de conforts pour les braves garçons qui sont à rêpandre lus sang pour nous.

A Grouville, l’honneur d’être la prumièthe à montrer l’exemplye qui s’sa probablyement suivi par les autres pârraisses.

* * *

Acheteu que je vos ai fait part de mes sentiments là-dessus, garçons, ou saithez bain que je ne s’sait pas du tout offensé quand j’ithai à vos assembliées, sis ch’est qu’ou n’m’offrez pas l’hospitalité pour latchelle ous avez tréjous ‘té ernommés. Ne vos dêrangiz pas pour mé si vos pliaît. Si je m’trouve un p’tit mio fatidgi à cause des longues distances que j’ai à voltigi, ou bain si ch’est que j’sis prins de tchiqu’unes de mes faibliesses périodiques, ch’est de m’s affaithes, et je peux si en cas garanti contre ch’la par persuader le Chef de n’fourni un “flask” que je peux rempli à ses frais siez Ph’lippe de Rougelion, dévant que de m’mettre en route.

* * *

Ah! tandis qu’j’y pense.

Ne termez pas rain d’spécial pour la s’maine du neuf Octobre.

V’là longtemps qu’ou liaisiz des accontes des pus graphiques dans toutes les gâzettes concernant les êvenements d’la djerre, mais, tant bain êcrites qu’i’ saient, i’ n’peuvent que vos donner une bain faiblye impression des scènes êmouvantes qui s’y produisent.

Eh bain, si ch’est qu’ou voulez, ou pouvez vaie la chose pour vous-mêmes avec vos propres yeux, assister personnellement à iune des pus grandes batailles qu’i’ y ait jamais ieu, la bataille de la Somme, sans couore le moindre dangi d’être atteints par les obus, les bombes, les boulets ou les gaz des Boches, ni sans même ressenti la moindre pitcheuthe de baîonnette.

Ous allez dithe que l’Caouain prend ses lecteurs pour des imbéciles, si ch’est qu’i’ s’imagine qu’i’ s’en vont craithe ditèt, mais tout d’bon garçons je n’sis pas à vos conter des blagues, ch’est tout-à-fait réel.

Tout chein qu’ous avez à faithe est de r’tenin des pliaiches au “Opera House” pour auchune séthée d’la s’maine du 9 Octobre, et d’y v’nin avec vos femmes, vos êfants, vos onclyes et vos tantes; enfin amenez touos vos gens, car ch’est une opportunité à n’pas mantchi.

Je tcheins d’la part de plusieurs personnes dignes de fouai, qu’ont veu le “film” de la “Bataille de la Somme,” en Anglieterre, que ch’est tchiquechose de merveilleux, et comme nou n’a oquo jamais veu.

Alors mes anmins, n’y mantchiz pas, et asseuthous d’vos pliaiches en temps, car si ou mantchiz de vaie chu “film” là, ou vos en mordethez les daigts pus tard, et ou dithez “Djantre, le Caouain nos avait dgernis pourtant!”

Caouain
La Chronique de Jersey 23/9/1916