Viyiz l’saint nouvieau-né
dans un bèr si p’tit,
enfliubé en Hivé,
dans l’corps et l’esprit;
Par d’ssus l’êfant dans san bèr
v’là tchi fliotte et danse en l’air,
tout pathaît si cliai et bé –
né v’chîn les papillons dé né.

La ville est à haûter
souos un blianc lîncheu,
Coumme tchi en dêpieauter
du péché d’achteu?
V’là tchi veint nos rêvilyi,
ch’est not’ Saûveux, Jésû Chri.
Né v’chîn sa nativité –
né v’chîn les papillons dé né.

La campangne est haitchie,
espéthant chutte jouaie.
Lé péché est gliaichi
souos la né tchi tchait.
Par les clios et les côtis
v’là tchi s’lanche à voltilyi.
Ch’est d’nos rêjoui à ces sé –
né v’chîn les papillons dé né.

Tout chu monde est bèrchi
abouon toute la niet.
La gliaiche es’sa pèrchie
par not’ neu solé;
i’ nos r’caûff’tha auve sa chai;
né v’chîn l’pliaîsi et la paix.
Cache, la mînséthe et l’péché!
Né v’chîn les papillons dé né.