Aniet ch’est Lé Jour d’l’Australie!
George d’La Forge vîsitit l’Australie en 1963 et êcrivit des lettres à la Gâzette du Sé entouor l’viage.

Today’s Australia Day! George d’La Forge visited Australia in 1963 and wrote letters to the Evening Post about the journey.

Nouos v’là arrivés à Fremantle, port prîncipa d’l’Australie Occidentale! Perth, la capitale dé l’Êtat, est à eune dgiêxaine dé milles pus haut et d’l’aut’ côté d’la riviéthe Swan, et ch’est par Fremantle qué san conmèrce trouve san c’mîn à la mé. ch’tait l’dgix d’dézembre, 1963, qu’j’avons mîns l’pid à tèrre en Australie pour la preunmié fais!

Ch’tait en 1829 qué l’Cap’taine Fremantle, dans l’navithe Challenger, prîns possession d’la riviéthe Swan et r’cliâmit, au nom d’Sa Majesté Britannique, tout l’territouaithe dé La Nouvelle Hollande tchi n’tait pon dêjà partie d’La Nouvelle-Galles du Sud. Dans la même année, La Colonie dé la Riviéthe Swan fut fondée par lé Cap’taine Stirling. Lé Cap’taine avait examiné les lieux deux ans d’vant, et ch’tait sus sa r’quémendâtion qué l’Cap’taine Fremantle en avait prîns possession pour l’Angliétèrre.

Auprès un tas dé r’chèrches ès envithons d’la riviéthe, l’empliaichement d’Perth fut chouaîsi, et un an pus tard la population avait grandi à 1,300 personnes. i’ n’fûdrent quand-même pon sans peines et mînséthes. L’ennion, l’absence dé communication auve lé rest du monde et l’hostilité d’s Aborigènes les vengeait. Mais, en fîn d’compte, i’ mênagîdrent à surmonter lus peines, et y’avait 5,000 pèrsonnes êtabl’yies là en 1840. aujourd’aniet, la population d’l’Êtat d’l’Australie Occidentale est dé 755 mille. La dêcouvèrte d’or à Kalgoorlie en 1893 asseûthit la prospéthité d’l’Êtat.

En marchant dans les rues d’Fremantle, nou pouorrait s’craithe en Améthique si nou viyait pus d’gratte-ciels par les c’mîns, et j’trouvis qué ch’tait d’même dans toutes les grand’ villes d’Australie à m’suthe qué nou les visitait.

J’feunmes rein qu’un jour à Fremantle. À ch’t heu j’nouos trouvons dans la Grande Baie d’Australie, et la mé est pus rude qu’ou’ n’avait ‘té pour eune volée. Il a venté raide, et v’là tch’a fait les p’tits moutons sauticotter sus l’haut des louaîmes. Lé navithe né crôle pon quand-même pour dithe, mais i’ n’fait pon trop bé sus l’pont à cause du vent.

J’feunmes deux jours à crouaîsi la baie, et quand j’gangnînmes lé Dêtrait dé Bass la mé ‘tait pus calme. Vendrédi, l’treize dézembre, j’arrivînmes dans la cauchie d’Melbourne, capitale dé l’Êtat d’Victoria. Ouaithe qué l’fanmeux Cap’taine Cook vit la côte dé Victoria eune sémaine dévant s’embèrtchi à Botany Bay en 1770, souoxante-quatre ans lus passîdrent dévant qu’la contrée fûsse otchupée par des pionnièrs en assez grand nombres pour en faithe eune colonie, et acouo siex mais pus tard dévant qu’y eûsse ieune à Melbourne. Quarante-sept ans s’étaient dêjà passées dépis la fondâtion d’la ville dé Sydney, dans l’Êtat dé la Nouvelle-Galles du Sud. Un mousse nommé John Pascoe Fawkner avait fait partie des pionniers tch’avaient êprouvé – sans rêussite – à colonîser la côte souos lé Lieutenant-Coronel David Collins en 1803. Trente-deux and pus tard, i’ fut iun des fondateurs dé la ville dé Melbourne!

* * *

J’arrivînmes à Sydney, capitale dé l’Êtat dé la Nouvelle-Galles du Sud, lé quatorze dézembre, 1963, lé viage dé Southampton ayant duthé trais s’maines et trais jours! Sydney est la pus grand’ ville dé toute l’Australie.

Ouaithe qu’autcheun rapport entre la colonisation d’Australie et la dgèrre d’îndépendance en Améthique es’sait pûtôt considéthé doutabl’ye, si chutte dgèrre-là avait finni difféthemment, la cité d’Sydney n’éthait p’t êt’ janmais existé! En 1770 lé Cap’taine James Cook, dans l’navithe Endeavour, dé 370 tonnieaux, navidgit l’long d’l’entrée du havre tch’est l’Sydney d’à ch’t heu, sans y’entrer, et li donnit l’nom dé Port Jackson en l’honneu d’un moussieu d’l’Amithauté Britannique. Auve lé Cap’taine Cook, y’avait un moussieu naturaliste nommé Joseph Banks tch’avait êtchipé l’expédition à ses frais. Lé navithe mîns à l’ancre, et i’ mîndrent lé pid à tèrre, dans la Baie Botanique, mais n’y restîdrent pon. Lé viage fut continnué lé long d’la côte dé l’Êst. Chutte partie du nouvieau continent fut nommé La Nouvelle-Galles du Sud viyant tch’i’ pensaient y vaie eune èrsembliance au comté de Glamorganshire, en Galles.

Onze ans pus tard, la dgèrre d’îndépendance en Améthique vînt à fîn, et l’nouvel Êtat Amétchitchain èrfusit d’accepter l’s hommes et les femmes condamnés qué les Juges Angliais continuaient à forbanni. I’ fallait don trouver eune aut’ colonie, et l’Sieur Banks, èrvénu en Angliétèrre, suggéthit la Baie Botanique au gouvèrnément. Sa suggestion fut adoptée en prîncipe en 1786. Lé Cap’taine Arthur Philip, dé la Marine Rouoyale, fut nommé Gouverneux d’la nouvelle colonie, et en janvyi 1788, onze navithes, auve pus d’mille pèrsonnes à bord – la pus grand’ partie d’ieux étant des condamnés forbannis – arrivîdrent et mîndrent à l’ancre dans la baie.

I’ s’adonnit qué l’Cap’taine Philip trouvit la côte trop basse et marécageuse pour y’êtablyi eune colonie. I’ décidit d’aller vaie l’s alentours du Port Jackson, et trouvit j’havre excellent comme lieu d’habitation et d’s’embèrtchi tout l’monde là. I’ r’nommit l’nouvieau port Sydney d’après l’Vicomte Sydney, ségrétaithe d’Êtat en Angliétèrre dans chu temps-là, tch’avait autorisé l’expédition. La date du d’s’embèrtchément, lé 26 d’janvyi, est célébré touos l’s ans en Australie comme jour dé fête.

* * *

Ch’est p’t êt’ la chaleu tchi fait l’s Australiens baithe d’la bièthe. Janmais d’ma vie j’n’en avais veu tant d’goudalée! L’s aubèrges sont ouvèrtes à certaines heuthes du jour. l’arlévée, ch’est dé chînq à six. À ch’t heuthe-là i’ sont tréjous plieinnes dé gens tch’ont eune sé încriyabl’ye! L’s alentours dé Sydney (jé n’pourrais pon dithe qué ch’est d’même par toute l’Australie!) i’ tchittent lus travas en temps pour êt’ là chînq heuthes et baivent autant d’bièthe comme i’ peuvent en avaler dans eune heuthe, sachant qu’l’aubèrge freunme à six. Ch’t heuthe-là est appelée “Swill hour!” Et les gens en ont tréjous dans la maîson étout. Eune boutelle dé quarte couôtait trais ch’lîns sept pennîns à Richmond, mais ‘tait un mio milyeu marchi à d’aut’ bords. Lé louis Australien vaut seize chélîns stèrling.