Un pâté Cornouaillais

Ch’t’ èrchette graietha un p’tit pâté Cornouaillais.

îngrédgeins:

• d’la pâte (100g dé flieu, 50g dé beurre, dé l’ieau)
• 100g d’la viande dé vaque (ou 50g dé fronmage pouor eune vèrsion végétarienne)
• 50g dé patate
• 25g dé suidiche
• 10g d’ouognon
• eune pînchie d’sé

Dans eune bolle, frottez la flieu d’auve lé beurre épis ajouôtez la pînchie d’sé. Vèrsez tchique d’gouts dg’ieau entrétant qu’ous ayiz eune pâte. Pêtrissiz la pâte épis rouôlez-la atout eune rôlinne-pinne, épis copez la pâte en eune ronde.

Tranchiz la patate et la suidiche et pliaichiz-les sus eune maîntchi d’la ronde dé pâte (en laîssant lé bord d’la pâte). Hadgiz (ou copez en p’tits buts) la viande et plaichiz-la sus les lédgeunmes. Hadgiz l’ouognon et parfénez-lé sus l’tas d’îngrédgeins. Pliez l’pâté en touônnant l’aut’ maîntchi d’la ronde dé pâte pouor couvri lé d’dans. Pînchiz lés bords d’la pâte pouor qu’lé pâté sait clioutiche. Atout un couté, copez un p’tit creux au hout du pâté, et fouângniz au fou pouor dans les trais-quarts d’heuthe à chent huiptante dégrés C.

Ouaithe qu’i’ y’ait du monde tch’y mettent d’la cârotte, chenna n’est pon, qu’nou dit, l’èrchette véthitabl’ye du pâté Cornouaillais.

Bouon appétit!