 |
| Douard Lé Bro (Ph’lippe dé Portînfé) |
Douard Lé Bro mouothit aniet en 1964. George d’La Forge êcrivit ch’t’ articl’ye entouor ses mémouaithes dé l’auteu et lus jannèche.
Edward Le Brocq died on this day in 1964. George d’La Forge wrote this article about his memories of the author and their youth.
En Améthique,
Lé 17 d’Avri, 1964Moussieu l’Rédacteu
J’veins d’ouï la triste nouvelle qué m’n anmin Ph’lippe, dé Portînfé, n’est pus. Hélas! M’s anmîns d’vièr temps lus en vont p’tit à p’tit. Si l’affaithe continnue jé s’sais beintôt tout seu d’ma sorte!
La pouorre vielle Mèrrienne s’en va s’trouver bein êpithotée, et ch’est seux qu’ou’ s’en va trouver les jours longs sans san bouan’-homme à la contrarier, et les nyits fraides sans san dos à êcaûffer ses pids contre! Même ichîn en Améthique j’m’en vais l’mantchi, l’vièr Ph’lippe, car j’liêsais tréjous sa colonne dans la gâzette pour mé donner eune idée d’la valeu des candidats dans l’s êlections et m’garder au couothant des bêtises tchi font dans l’s États eune fais êlus, et d’la mannièthe tch’i’ votent tréjous “Pour” quand ch’est eune affaithe dé dêpenser nouos sou ou d’creûser des tonnelles!
Il ‘tait écrivain d’la preunmié trempe et mangnifique comme rapporteux et rédacteu d’gâzettes. Les p’tits buts dans ses “critiques” quand il en publyiyant ieune ‘taient souvent risibl’yes et à propos, et ch’est seux tch’il en m’ttait entouor mé – comme entouor bein d’aut’ – quand j’tions tous jannes et qu’j’allions vaie les hardelles et les r’condithe au Dinmanche au sé auprès l’sèrvice dé l’églyise ou d’la chapelle!
Les morts et l’s entèrrements dans les maiethons font des changements, mais j’avons veu bein des changements ensembl’yes dans la vie, le Ph’lippe et mé. Il ‘tait pus vyi qu’mé, sans doute, mais j’tions quand-même jannes en même temps, et j’fus né à La Forge, pon bein liain d’Portînfé, et j’les viyais souvent, li et Mêrrienne. Dans chu temps-là nou faîsait sèrvi des lantèrnes atout des f’nêtres dé corne à la pliaiche dé vèrre quand nou sortait au sé et qu’nou n’viyait pon la main d’vant sé. L’s hommes mettaient acouo des braies d’bâthîn et des c’mînses dé molleton, et n’avaient pon d’peux d’marchi deux pas. À ch’t heu, ch’est les femmes tch’aiment à en mettre, des braies, mais pon d’bâthîn! Nou n’viyait janmais d’femmes atout des courts chéveux et eune cigarette à la bec. Dé nouos jours ch’est l’contraithe – les jannes hommes ont les j’veux longs et les femmes les gardent courts!
I’ n’y avait pon d’motos à porter les gens partout, et nou-s-allait à pid la grand’ partie du temps. Lé Sanmedi, un tas des femmes du vaîsinné allaient en ville par la beusse à Mait’ Harry L’Boutilyi. Les jannes hommes lus rencontraient au Pallion ès Landes, en d’vant d’la maiethon à Mait’ Darri L’Cornu, lé Dinmanche l’arlévée pour bailli d’lus bec et s’passer l’temps. Y’avait des courses sus Les Landes dans l’êté, et les soudards (les rédgulièrs, car y’avait des régiments Angliais en garnîson) v’naient y tither au blianc. Lé Dinmanche il’ allaient en parade atout lus rouoges câsaques à l’églyise dé St. George, et j’n’avions qué d’créver d’rithe à ouï l’Révérend Barascud, tchi n’savait qué l’Français, êprouver à annoncer les cantiques en Angliais! Mait’ Elie Maugi, péthe du Seurveillant d’à ch’t heu d’la Grande Églyise, ‘tait en chèrge d’l’Êcole du Dînmanche, et nou n’ôsait pon rithe quand i’ vouos r’gardait, mais nou faisait la minne dé s’torchi l’nez et nou riait dans san mouochet! Ch’est vrai qu’nou n’ouïyait pon fort d’Angliaîchin’nie dans ches temps-là, et j’n’en savais pon, un mot quand j’allis à l’école la preunmié fais à l’âge dé sept ans.
Lé Ph’lippe ‘tait un bieau janne homme. Nou peut dithe tch’il a tréjous ‘té un bel homme, même dans sa vieillèche, et il ‘tait tréjous habilyi comme un moussieu. I’ n’avait janmais d’peine à trouver eune janne fille à r’condithe auprés l’sèrvice. La Mêrrienne fut chanceuse dé l’gaffer, mais ou’ l’a tréjous bein souangni et il’ont ‘té heutheurs ensembl’ye. Lus d’scendants sont illustres et f’thaient honneu à autcheune fanmile.
L’s années lus sont passées si vite qué j’n’avais pon rêalisé qué j’tions dév’nus si vièrs, lé Ph’lippe et mé. Enfin, les bouans s’en vont et les mauvais restent, et mé v’là acouo par les c’mîns! Tch’est tchi sait, j’pouorrais p’t êt’ vivre assez longtemps pour aller à la Leune! Dans s’n articl’ye dans la gâzette du 8 dé Févri, Ph’lippe nouos disait qu’les Russes et l’s Améthitchains allaient lus établ’yi d’ssus un mio pus tard, mais tch’i’ n’tait pon d’avis d’y aller li’même viyant tch’i’ n’y avait ni femmes ni aubèrges là! Eh bein, dépis j’sis iun d’ches Améthitchains-là j’éthai p’t êt’ la chance dé y’aller. Quant ès femmes, j’sis accouôteunmé à m’graie sans. L’s aubèrges né m’intérêssent pon – j’aime mus aver eune fais à baithe à la maiethon ioù qu’nou n’est pon enfeuntchis par la feunmée d’cigarettes, et ioù tch’i’ n’y a autcheun dangi d’aver l’s ouothelles accâbliées par lé bargouaichîn des b’veurs tchi hantent ches pliaiches-là! Mais châtcheun embraiche sa femme à sa manniéthe. J’accordions comme des clioches, lé Ph’lippe et mé. J’m’en vais mantchi ses articl’yes dans la gâzette . Il’ ‘taient tréjous si pliennes d’humour et d’anecdotés. Honneu et hommage à sa mémouaithe!