Eune articl’ye dé Ph’lippe Lé Sueux Mouothant publiée sus la Morning News du 17/9/1913. Mais tch’est qui s’adonnit à la batt’tie?
A Pain family tale from 1913 – plenty of drama and comedy, but we’re still none the wiser as to what actually happened between 5 o’clock and half past five to cause such ructions…
J’fumes Lonore et mé et Piteur, lus aidji lus jour de machine, siez not’ couosin Ouitté, la s’maine passée. Mais ch’est bin fini! Jommais pus j’ne r’mettron les pids, ma fille ni mé, siez chés gens la. J’avais dit oui, d’bouan tcheu, quand Sophie vint de d’mandé d’allé aidji a plé les poummes-terre, esdimé les paids d’mai, et met’ la viande au fou. Je n’m’atendais certain’ment pon a ètre affrontée comme je l’fut.
Nos v’la don arrivées par la ‘bus. La machine ronfliait déjà, et chatchun s’moustrait aussi douoch’ment qu’possibye. Piteur halli sa casaque, r’troussi ses manches, print eunne frouque, et, après avé bu eunne modjie d’cidre, s’en fut dvisé souos un poumi ov Douard Bigthé – l’sien qu’sa femme fut dans l’grand-banc l’mème Dinmanche que mé et qu’a mal touoné d’pis. Pour de mé, après avé oté man bouan fro et mins yun des siens a Sophie, j’me mins entouore les paids-d’mai, tandi qu’Lonore lus aidji a met’ la vaisselle sus la longue tabye qu’avait ‘té pliantée dans la caros’ie. Quand vint l’heuthe du diné, ne v’la tout l’monde qui s’desbarbouillent a la pompe; et quand i’ futes a tabye, j’lus apportimes a mangi. Eunne rouelle de boeu de d’siez Dobbin, des ledjeunmes par le cabot, arrosés d’gravy fait avec le jus d’la viande, d’la flieau, et deux pots d’ieau bouillante.
Et pis, l’diné fini et l’travas r’quémenchi, nous s’mint a r’pathé tout. Mais Lonore avait dispathu! J’la r’trouvi grimpée sus l’haut du tas d’éstrain a passé les fagots és deux garçons a Jim Jeandron. Ou pouez pensé si j’la fit d’vallé quédainne! et coumme je n’la perdi pon d’veue tout l’restant d’l’arlevée! Minzéthabye! que j’lis dit: Estche ta plieche d’étre jutchie sus d’l’èstrain ov des fils d’fermi couerts de ponsi, quand y’a tchiqu’un en ville, en néthe casaque et blianche c’minze qui s’en vint bethe-du-tée siez nous après d’main?
Mais ch’fut quand vint l’heuthe de s’en r’allé qu’j’attrapi quazi l’coup d’la mort! J’en fremis oquo d’un terribye fremis’ment en y pensant! Jommais d’ma vie n’avait té insultée d’la sorte! Jommais autchun membre de ma famille – ieunne des pus anciennes familles de Jerri, si vos pliait – n’avait yeu a supporté l’affront qui m’fut fait par unn minzéthabye pamphéque, par un ésternelle laiduthe, autant qu’je l’dise, coumme je l’fut entre chinq heuthes chinq heuthes et d’mie d’chu jour la.
J’nos en r’vinmes a pi, ma fille et mé, en plieuthant tout l’long du c’min – nous verrait oquo a ch’t’heu les plieche ou-ès qu’nos lermes ont éscliatchi les pignons des maisons et Lonore m’a dit d’pis qu’ou se s’ait ésvonnie deustrés fais sinon qui n’y’avait pèrsounne pour la r’chevé dans ses bras.
Mais ch’est bin fini! Jammais pus j’né r’mettrons les pids siez Sophie: jommais pu j’n’ithait a s’n “at home”: et j’nos n’allons lus renvié ch’qui reste du cabot d’poummes qu’ou nos apporti l’aut’ jour!
Coumme j’disais a Lonore: Quand nou pense que ch’est nous qui lus avons apprins a s’comporté coumme y faut: qu’ch’est nous qui lus avons montré coumment t’nin sa tasse de tée és ‘at homes’, coumment chatchi d’main a la mode angliaiche; coument s’assiethe dans un fauteuil coument……………….
Enfin! ch’est bin décidé. Never no more!