Eune articl’ye par GW de Carteret des Chroniques de Jersey en 1928:
Here’s an article about having to find new accommodation:

Couomme nous sait, il y a hardi de docteus qui sont d’avis que la milleuthe médecine pouor nombre de maladies est le grand air et l’solé.

Ch’est d’antchi nous vais touos ces visiteurs qui viennent en Jerri pouor lus holidays qui lus piaisent à s’faithe rôti la piaue au solé, allongi touot lus long sus l’sablion. Et couomme ils n’ont quassiment rein sus l’dos, les hommes aussi bein que les jeunes hardelles, touot chu monde rentre en Angliéterre la piaue pouor ainsi dithe tchuitte.

Il y en a d’autres qui trouvent éttouot que l’camping dans les mielles ou ailleurs vaut mus que la milleure boarding house.

Mais si l’vièrr Phlip est pouor ainsi dithe à camper d’pis la St. Michel ch’n’est pon par ordre du docteu pouor seur! Et pis viyous, l’camping n’v’la qui s’passe encouore assez bein dans la belle saison mais achteu n’v’la qui n’est pon si piaisant, surtout quand nous est obligi de cooker son mangi sans âtre ni foyi.

Pouor dithe l’vrai, notre Phlip est bein à piaindre et ch’n’est pon mé qui voudrait faithe une riselée de san triste sort.

N’v’chein sa triste histhouèthe.

Il y a tchiques mais d’chunna, la buanne femme a tchi qu’appartenait l’ménage iou que Phlip, sa Missis et lus mousse étaient louogis, trouvi un angliais qui l’y offrit buan prix pouor chu ménage. N’v’la qu’était allright mais couomment faithe pouor que Phlip tchitte? Ch’est que chute anglais voulait bein acater l’ménage mais à condition de v’nir l’habiter à la St. Michel.

Donc, la buanne dame alli trouver Phlip et ly laissi entendre que s’il tait consentant d’sorti pour l’mais de Septembre il en s’rait récompenser car pouor l’amour de bailli la propriété à si buan compte oulle s’rait généreuse et il en aurait une buanne poignie.

Phlip pensi que l’mus à faithe était d’aller sièz san vaisin qui couonnait hardi les louaies et coutumes de Jerri.

J’pense bein que l’vaisin l’y conseilli de n’pon mantchi pareille buanne chance et dut ly dithe éttouot qui pouorrait tréjous trouver un louage pour ly, sa Missis et son garçon.

Quant y rentri sièz ly il tait d’buanne humeuthe et bein content. Y raconti à sa Missis chein qu’il en était et chein qu’il avait dans l’idée d’faithe.

Le lendemain, d’buan matin, l’v’la hors vais la propriétaire pouor ly dithe que pouor ly faithe plaisi et ly rendre service il avait décidé de tchitter l’ménage à Septembre, bien entendu ès conditions qu’oulle avait offertes.

N’v’la donc touos nos gens satisfaits et Phlip signi d’buan tcheur l’papi de chut accord entre ly et sa propriétaire.

Chunna étant, la maison fut baillie à chu Moussieu angliais.

Faut craithe que Phlip avait s’n’idée pouor n’pon aver à r’muer devant Noué. Ch’est p’t’être chutte idée là ou sa complaisance qui fit que quand il apprins que chu Moussieu était arrivé, il alli cherchi touot son bataclian au baté pouor l’apporter à la maison.

Couomme Phlip à buan tchèur y ly donnit éttouot du lait tant qu’il voullait et d’buans oeus tout frais tant que les poules voulaient pondre. Ch’est que chut angliais était un Moussieu qui n’avait pon peur de chaqui d’mains avec Phlip.

Touot ally d’charme pendant un temps et j’pense que Phlip criyait que n’vla qui s’rait allright et qui pouorrait rester dans l’s’appartements jusqu’à Noué car oprès touot quand nous cherche à faithe plaisi ch’est bein l’moindre que l’sien à tchi nous fait plaisi en sait erconnaissant et cherche ly éttouot à faithe plaisi.

Quant vint l’moment d’saver à tchi s’en t’nir n’v’la qui fut une autre chanson.

Chu Moussieu là n’en était pas ieun viyant qu’ayant acaté la propriété il entendait en jouir à san touot seu et pouor ly un accord était un accord même si l’pouorre Phlip avait à couochi à la belle ételle avec sa Missis et son mousse. Touos les appartements de chutte maison il ly fallait pouor la St. Michel.

Viyant chunna notre Phlip s’mint à compter combin d’pintes de lait qu’il avait fourni à chut homme, combin de douzaines d’oeus il avait ieu à fricachi ou à tchuire autrement et combin que l’charriage du batacliant valait car pouor un individu qui n’a pas d’avis et de r’connaissance pouortchi qu’nous ly f’rait touos ches plaisirs pour rein!

Phlip alli éttouot d’mander l’avis de Charles, son vaisin, mais Charles est un homme diversement réservi et qui pasle pon trop vite et y n’vouli pon s’mêler de chutte affaithe. Il alli éttouot sièz Tom qui ly s’fit que l’mus était de consulter un homme d’affaithes mais ces oisiaux là d’Hill Street n’font pon rein pour rein.

Tréjous est y que quand vint la St. Michel, Phlip s’vit obligi d’mettre ses meubles dans la grange et sièz une vaisine et d’cooker san mangi quassiment oprès d’la maie de d’fumi en plein air.

Nous peux dithe chein qu’nous veur mais n’v’la qui n’est pon fair play d’la part du sien qui s’crait un Moussieu angliais et qui d’vait avèr pus d’avis!

Lé Cahouain
24/11/1928