Lé 10 d’Avri 1928 L’s Êtats votîtent la preunmié louai sus la taxe sus l’èrvénu. Lé 14 d’Avri 1928 ch’t’ articl’ye du Cahouain fut publiée dans Les Chroniques de Jersey:

Only 4 days after the States passed Jersey’s first income tax law, the ramifications of various allowances were discussed in this Jèrriais article:

Mon doux! quand à mé n’v’la qui n’m’empêchera pon de dormir car j’sis bé seur que chunna n’affectera pon d’pouores gens couomme la famille du Sieur Caouain. Mais ch’est pon d’même avec touot l’monde, y faut craithe, car ch’est qu’il y en a ieut de la caquetterie touos ces jours à l’entouor de chein qu’nous appelle l’impôt sur le r’venu.

J’en connais ieun qu’est couomme nous dit pouorri d’sous et qu’est achteu au mespé viyant qu’avec dithèt impôt pon d’affidavit couomme pour l’rât mobili pouor s’faithe mollir. Ly qu’est inscrit au mobilyi dans sa paraisse pouor diez quartchiers et qui d’vrait, pouor seur, en payi dièz fais autant passe ses nyits à s’traccachi pour saver couomment qu’il en r’parathers chutte fais. S’il avait seu! ch’est ly qu’en aurait mins des sous dans le loan de la contribution, couomme bein des grands de l’Ile l’ont fait, à chein qui dit et touot chunna pouor n’pon a avèr à payi “l’income taxx.”

Il y a éttouot tchiques vièrrs garçons qui passent lus temps à faithe un tas de caltchullerie pour savèr si en lus mathiant ils écaperaient à chut impôt d’pis que la louai accorde à un homme £100 par an pouor l’maintien et entretien de sa Missis et un p’tit pouor les aviers. L’pièthe ch’est que si la hardèlle d’lus choix à du cliou à ly et n’v’la qu’est tréjous bein utile, chunna s’ra autant à rabattre sus l’allouance. N’v’la qui n’est pas “fair play,” couomme s’faisait Frainque l’Hermitte. Oprès touot n’v’la qu’est bein d’avèr une femme siez sé pouor faithe la tchuisine et le raccomodage mais c’est que d’nos jours n’v’la qui couote car avec la mode de ch’est bas de soie il faut en acater une pathe touotes les s’maines d’pis qu’nous n’peux pon ravauder de la soie artificielle faite avec du bouais!

Quant aux aviers, l’rabat n’en vaut quasiment pon la peine oprès touotes les minsèthes à endurer. Et criyous que n’v’la qu’est plaisiant d’être révillyi au mitan de la nièth par la p’tite musique d’un avier même si nous n’est pon obligi de se déshaller du lièt pouor éprouver à faithe taithe chu chièr p’tit!

Mais à l’entouor de touote chutte affaithe y faut que j’vos raconte une p’tite scène qui s’passi l’autre jour et qui démontre qu’il est grand temps qu’il y ait des femmes dans les Etats.

Mary Herpins qui n’a jamais ieu d’gallants et n’en veur pon d’pis qu’oulle peux s’grée d’charme sans d’mander d’sous à tchique ce soit et n’veur pon partager les siens, donc Mary Herpins a touot pliein d’temps pouor lièthe les gazettes. Y faut dithe qu’oulle est un miot suffragette et que touos l’s’ans oulle s’fait seur que son nom est bein inscrit sur la liste électorale de sa paraisse. S’n’ambition ch’est de devenir la preumièthe députée aux Etats de Jerri et n’v’la tchi explitche pouortchi qu’oulle lit tréjous les rapports des séances des Etats.

Pus d’iun de nos grands Messieurs n’s’raient guère fliattés des r’merques qu’oulle fait tchiques fais à lus égards.

L’autre sé elle alli sièz sa vaisin, Missis Grattesous et s’fit: Là tchès j’vos avais dit. Le projet a été adopté par treis voix de majorité. Si j’avais été dans l’s’Etats l’affaithe ne se s’rait pon passée d’même. J’l’us aurait d’mandé tchi justice qui trouvaient dans dithèt louai. Pourtchi un rabat de £36 par an pour le premier mousse et rein que £25 pouor l’s’autres. Et tchès qu’en s’ra pouor des twins? Chutte louai est une honte pour Jerri. Nou n’y vais que feu et les hommes d’affaithes ieux mêmes disent qu’ils n’y comprennent mot mais y sauront bein touot d’même chèrgi lus fees quand nous s’ra obligi d’aller à lus offices pouor saver couomment s’y prendre pour remplir les cédules.

Oulle allait continuer à d’viser d’même quant l’tchan s’mit à ouasser viyant qu’il y avait tchicqu’un dans le bel.

Missis Grattesou alli vais. Ch’tait l’amin Philip, l’sien qu’est risiblye de sa sorte et tréjous d’buanne humeuthe.

Entrez pardedans criyi la Missis, entrez Mess Philip.

Ch’est justement vous que j’voulions vais, s’fit Mary Herpins car j’étions à d’viser à l’entouor de chutte louai sus l’r’venu et tchès que vous en pensez.

– Tchès que j’pense? Que les siens qui ont paieront et que les siens qui n’ont pas n’paieront pas.

– Bé suer, vours trouvez chunna juste.

– Absolument.

– Eh bein, si ch’est si juste pouortchi chutte difféthence d’allouance pouor l’premier avé et l’s’autres. est-ce que le premier né couote pus à élever que ses frèthes ou soeurs. Est-ce qu’il n’faut pon payi l’même prix au docteu ou à la nurse?

Savous chein que réponnit l’amin Phlip? Ecoutez:

– Y faut craithe que nos Messieurs ont pensé nennin et chunna viyant qu’nous n’accate pon une nouvelle bassinette ou pram à chaque naissance et que l’même berre peut servir à touos. Et pis l’s’effets du grand peuvent erservir ès autres!

Cahouain
14/4/1928