La femme à Tom Crâsset est terriblyement nerveuse.

Toute sa vie oulle a souffert des agonies châque feis qu’i’ faisait d’orage.

Au premié êpar de feu oulle envelope sa tête dans san d’vanté et s’couoche sus san sofa poussant des affreux soupirs à châque coup d’orage.

I’ y a du monde de même et que nou diche chein qu’nou voudra, i’ n’peuvent pas s’y c’mander.

Nou dit que ch’est l’êlectricité qu’est dans l’air qu’à ch’t êffet-là sus ieux.

Mais pour la pouore Sophie i’y a oquo autre chose qui l’affecte pus sérieusement que n’fait l’ôrage.

Ch’ést des tremblyements d’terre !

Et comme à ches dernyi ils ont ‘té assez fréquents en Jêrri, la pouore femme est continuellement dans un êtat d’êpouvante.

Touos les jours oulle êtudie la baromette qu’est pendue dans l’allée et si ch’est qu’ou baisse pus vite que d’habitude ou dit à s’n homme : ”Y a tchiquechose qui m’dit que j’allons aver un tremblyement d’terre !”

Tom s’en moque, li, mais quand oulle a ches idées-là dans la tête ou n’li permet pas de sorti de sus les prémisses car comme ou dit, ”Si ch’est qu’la fin du monde est pour venin, je veurs mouothi à côté de m’n homme !”

Mais i’ y a des occasions que Tom est obligi de sorti quand même.

Il est diversement interêssi dans la politique et dans l’s affaithes de pâraisse, et jamais i’ n’manque une assembliée.
Ch’est pour chenna que l’aut’e sé il ‘tait à l’assembliée des êlecteurs pour la nomination des chantn’iers et opprès l’meeting, ayant accepté l’invitation des candidats i’passi une sethée bain agréable avec ieux.

Il ‘tait mînièt quand i’ les tchitti et quand i’ vint à sorti à l’air i’c’menchi à s’trouver tout drôle et malgré qu’i’ y avait une êpaisse biâse i’ viyait des êtelles partout et une demié douzaine de comètes qui s’entre poursuivaient dans l’firmament.

Opprès un certain temps i’s’trouvi comme nou dit, enfantômé et perdit san c’min.

I’ se trouvi à la fin grâce à san tchan qu’était v’nu l’rencontrer.

Quand il entri dans la tchuisine il avait grand envie de s’assièthe mais les tchaithes et l’sofa li pathaîssaient toutes chein d’sus-d’sous et touanaient tout attouo de l’appartement.

Le pouore Tom étais tout êtourdi et comme i’sentait qu’i’ s’en allait tchaie i’s’cramponni au drécheux pour se souotenin mais le malheur en vouli qu’i’ halli trop du d’sus et l’capsizi par sus li dans l’aithe.

V’là qui fit un frédas abôminablye qui châtchi la maisons et touos les vessiaux furent mins en telles sur l’aithe en chiment.

Sophie lyi qu’était couochie, mais qui n’avait pas peu s’endormi, quand ou oui chu tintamarre là et senti san lièt châtchi, se mins à crier “Au S’cours !”

Oulle ‘tait bain convaintchue que ch’tait oquo un tremblyement d’terre.

Tom ramonti les d’grèts du mus qu’i’ pu mais malgré qu’i’ s’était rassobri un mio ne pus pas raîpondre toutes les tchestions à Sophie.

”As-tu sentu le tremblyement d’terre Tom ?” ou li d’mandi.

Tom vi tout d’suite qu’il ‘tait sauvé.

Le tremblyement d’terre s’en allait être responsablye pour la catastrophe qui v’nait d’s’arriver dans la tchuisine.

”Ouest qu’tu étais quand v’là tchi s’est arrivé ?”

”Je v’nais justement d’entrer,” s’fit Tom, ”et j’étais à haller mes bottes et tout-d’un-coup j’ai sentu une sécousse et j’ai veu l’drécheux qui s’êtravelait dans la tchuisine. J’ai grand peux ma pouore fille que touos les vessiaux sont bûchis.”

”Fiche des vessiaux !” se fit Sophie, je devethions être bain erconnaissants que j’en avons rêcappé avec la vie.”

”Vaithe dja ! dit Tom.

Et au jour d’annièt ch’t hypocrite-là n’a jamais confessé à sa pouore femme que l’tremblyement d’terre fut causé par la trop grande generosité des candidats pour chantn’yi et par la faibliesse de s’n homme qui n’sait jamais quand il en a ieu assez.

Caouain
26/3/1927