Eune articl’ye en Jèrriais par Marie la Pie (Frank Le Maistre) 25-2-1939, liue par Geraint Jennings
(NB article includes content reflective of social attitudes of the time not consistent with modern sensibilities)

Mé v’chîn! Jé n’sis pas morte, nan dgia ma fé. Mais y’a longtemps qué j’n’avais êcrit du niolîn – dé chu niolîn tch’est si bein apprécyi par les lecteurs dé la vielle Chronique. Et la raison? Est-che la pièrcheuseté? Sait-che lé manque d’encouothagement? Ou par être à la naque dé nouvelles, ou bein acouo manque d’encre et d’papi? Ofûche trop embarrassée à porter des contes? Tch’est qu’ch’est, don? J’sis seuse qu’ous aiméthiez tous bein saver, mais, ma fouai, bouannes gens, jé n’séthais pas vouos en dithe la cause, dévrai, nan. J’n’ai pon êcrit pour eune volée et né v’là tout. Jé n’peux pas dithe autrément car jé n’sai pas mé-même la raison. Là, don!

Enfin, jé sis seuse qué ou s’sez contents d’m’èrvaie et qu’ch’es’sa au mains eune consolation pour vous d’saver qué j’sis acouo sus chutte tèrre et qu’j’ai acouo toutes mes plieunmes. J’en attrapis dans les travèrs dé Noë, dans l’temps d’la né – ah, j’en eus pliein l’dos, j’vouos asseuthe! Faut penser qu’à chutte saison n’y’a pon grand abri dans l’s ormes. Pas eune maudite fielle tchi peut m’couvri la pus p’tite partie du corps, et j’en tais crépiè jusqu’ès os. J’en attrapis, j’vouos garantis, car, gâdéouelle, fait-i’ fraid – véthe, fait-i fraid! Oua don, nou passe lé travèrs dé tout et v’là tchi vouos endueurchit! Et pis, né v’lo l’êté qui veint!

Allons, deux ou trais p’tites scènes – des histouaithes, j’dévthais dithe, car si j’pâle de scènes y’a bein des gens (des wesleyens et des salutistes, par exemplye) qui m’liéthont pas pus lian!

Eh bein, un cèrtain moussieu a eune fille qu’est hardi vithouarde. Oulle a tréjous ‘té d’même et oulle y mouorra. Nou l’a tchiquefais ouï dithe’ i’ pathaît, qué s’il avait seu i’ l’éthait n’yée en naissant! O mais, tout d’même, est-che là d’tchi dithe, est-che pas! Mais oulle a d’pis 35 à 40 ans acheteu et, comme i’ dit, i’ n’est pas temps d’y penser. Enfîn, n’împorte, chutte bouistre d’hardelle en a fait dé toutes les sortes. Ou porte des contes, dit des menneties comme un êracheux d’dents, prend autcheune chose qui n’li appartcheint pas et qu’ou peut mettre la main d’ssus, va êpier siez les vaîsîns quand i’ sont hors, casse les vaissieaux au pliaisi d’la vie, mange comme un loup affanmé, s’emporte pour un rein et rit comme eune folle quand oulle a fait mêché. Sapresti, ou pâlez d’eune tchèrouongne! Sans doute, la garce a l’esprit viscasié.

Eh bein, lé péthe dé chutte garce li’a bailli des rondes assez pour la tuer mais n’a dgéthe peu la corrigi. N’y’a pas longtemps – hé, y’a p’têt deux’trais ans tout d’même – moussieu fut à la boutique qu’si eune grand’ boutelle dé huile dé casto et dit tout sîmpliément au boutitchi qu’il avait foutu eune dêgraisseuse à sa grand’ garce d’hardelle et qu’oulle ‘tait au liet, appathemment sans vie et, pour eune fais, maîtrisie; qué i’ s’en allait lî bailli d’l’huile pour la ravigotter car il avait peux qu’ l’engrout la tueuthait et qu’sans doute i’ s’vèrrait pendu pour ses méfaits! Lé bouonhomme eut peux, sapresti, et filit dêliêment à qu’si d’l’huile dé casto pour l’endgèrdgichonner comme nou f’sait eune bête, respé! Assa, av’ous jammais ouï pâler d’ité? Nou pâle dé drôles dé choses qui s’arrivent mais n’en v’chîn ieune qu’est bein drôle, tout d’même, criy’ous pon? Si ch’est la véthité, sans doute. Car, ou savez, les gens content tant d’bliues pour lus amuser – n’y’a pas à s’y fier. Comme disait mait’ Ph’lippe Cordéret du Dou dé D’mi aut’fait – la grand’ partie des menneties qu’nou m’raconte sont fausses!

Là, j’avais bouonne idée d’en dithe acouo bein d’autres, mais l’temps s’passe, et j’n’ai raconté qu’eune histouaithe. J’vos en rêsèrve pour eune aut’fais, mais noufait – j’vos en dithai acouo ieune, tout d’même. Au sujet d’un cèrtain propriétaithe dé St Ou. – ou est-che ailleurs? Jé n’sis pon trop seuse dé la pâraisse, mais enfîn, tréjous, i’ pathaît qu’chette-chîn est la véthité, J’ai ouï dithe qu’il avait sa p’tite fèrme louée a dgix ou douze louis la vrégie. Sans doute, en preunmié lieu, il a affaithe à un îmbécile, car ouêqu’est la tèrre, j’voudrais saver, tchi vaut un ‘té prix’? Eh don, chu pouorre médgian n’fut pon justément si chanceux l’année passée comme hardi d’ses vaîsîns et i’ pathaît qu’i’ n’put pon payi ses dettes, d’un bieau but. Mais appathemment qué l’propriétaithe sé comptait bouon et pensait d’êt’ payi dé préféthence ès autres créancièrs. I’ pouvait sûfflier! Lé loyi n’a pon ‘té seulement à maintchi réglié et n’est pon sus d’y’être!

Eh bein, v’là tchi li’apprendra à chu juis d’propriétaithe, eune bouonne léçon dé n’être pas si gourmand à l’avenîn! V’là tchi l’sèrt bein.

Marie la Pie
25/2/1939