Un texte du Cahouain:

Couomme j’voulais en saver un p’tit pus long sus ch’est jeunes vagabonds qui quassiment touornites les sangs à ces jeunes filles de St. Ou et lus mémée en amathant un bouton à la f’nêtre et par haler dessus l’faithe tapper à l’ozanne, j’sis allée ès écoutes.

Ch’est d’antchi oprès un p’tit touor dans la niche du mont de la Grève de Lecq, j’alli l’autre sé aux écoutes et je me jutchi dans ieun des bouais à l’entouor du parish hall, de chu parish Hall qu’nous voulait faithe un théatre pouor y douonner des ‘’pantomines” !!

Viyant une djingue de jeunes corps qui paslaient et riaient j’m’apprêchi un p’tit pouor saver de tchi qui paslaient et j’en oui ieun d’eux s’faithe: Ch’est té, Garnett qui disent que tu avais amathé chu bouton à la Ville au Bas, et chunna viyant que l’année passée t’avais acaté du fi à la boutique à Mess Du Feu.

Garnett qui n’y était pouor rein’ s’marri et s’fit que s’il avait acaté du fi ch’tait pon pouor amathé un bouton à une ozanne mais pouor en coudre ieun iou qu’il en avait besoin !

J’écouti encouore mais du diantre si j’oui autre chose à l’entouor de chute farce car d’pis que Garnett s’était marri nos gars parlites pus de chut affaithe.

Viyant chunna et couomme y sonni diez heuthes à l’horlouoge du Parish Hall j’pensi d’aller faithe une touornée sus les monts et dans les mielles j’rencontri des gens qui étaient à la chasse. Ver a passé dièz heuthes du sé!

Wizz, bang ! et du pliomb menu couomme grille passe près de mé aussi bé vite j’patchis ma tête dans mes plieumes car fiche du restant d’la vieille carcasse. J’en pathis mais a but d’vent et trembliant couomme une feuille sus un bouais je me jutchi sus l’nau du ménage à m’n’amin Geff.

J’étais là d’pis deux ou trais ou minutes quant j’aperchus un mulot qui s’proum’nait dans le bel, s’il vos pliait. Et ma fé, couomme ch’tait un buan fricot inattendu j’voli dessus et j’l’attrappi au but d’une vieille muthaille. Oprès chu fricot j’vit qu’nous avait mins là un avis en grande lettres: ‘’Beware of Men’traps” !! N’v’la qui m’rappeli qu’une fais un jeune corps de St. Ou, qui était tréjous à jouer des farches fut happé dans ieunnes de ces traps et y fallu crier au forgeur d’la paraisse pouor l’en déshaller.

Oprès aver ristchi d’même ma vie par deux fais, j’pensi que lus mus était d’aller m’r’poser un miot dans ma niche du mont de la Grève de Lecq en attendant la sinette du jouor pouor rentrer sièz nous vais chein que l’Sieur Caouain avait fait ly qu’est quassiment hors touos les siers soi disant à voltigi ès écoutes.

J’ai grand r’gret de ne pon en aver apprins un p’tit pus long à l’entouor des vagabonds de St. Ou qui jouittes chuttes abominable farce mais p’t’être que pus tard j’en aurais pus à dithe.

****

Pouor dithe vrai j’sis, touote bête qu’est la feumelle d’un Caouain, du même avis que les grands d’la paraisse de St Ou qui, Mercredi au sé, s’rendites au Parish Hall, à l’assembliaie pouor faithe ermarquer que chu parish hall n’est pon un théatre.

J’crais quassiment que s’il y avait ieut de l’opposition il y aurait ieut une pantomine touot d’même dans chu parish hall car il y avait de l’électricité dans l’air couomme nous dit et pouor seur il y aurait ieut du feu de satchi, fouai de Marie Hibou. Ch’est que dans chutte paraisse nos gens n’ont pas peur d’paslé et dans lus d’vis ils n’y vont pon par quatre chemins couomme disent les normands de France.

****

Encouore une fais touot Jerri s’otchupe de la tchestion de la contribution et dans touotes les paraisses y s’en va y avèr des meetings iou que les députés mantchis et les siens qui voudrait la job s’en vont d’viser.

L’buanhomme Philip ly est d’avis que touote chutte caquetterie ne servira à rein et crai que si nous enviait sa couosine Trachy vais Moussieu Churchill à Londres qu’oulle arriverait à settler l’touot entre deux tassées de thé couomme vint d’l’faithe Lady Houston.

Tchès que vous en pensez ?

Cahouain
26/11/1927